নাগালেণ্ডত শ্বাসৰুদ্ধকৰ ৰাজনৈতিক পৰিস্থিতিঃ এফালে নিৰ্বাচন বৰ্জন, আনফালে বাধা নিদিবলৈ আহ্বান নিৰ্বাচনী বিষয়াৰ

‘আমি নিৰ্বাচনৰ বাবে সাজু। নিৰ্বাচন প্ৰক্ৰিয়াত বাধা নিদিবৰ বাবে মই সকলোকে আহ্বান জনাইছো।’ আজি কহিমাত সাংবাদিকক নাগালেণ্ডৰ আগন্তুক নিৰ্বাচন সম্পৰ্কে এইদৰে জনাই নাগালেণ্ডৰ মুখ্য নিৰ্বাচনী বিষয়া অভিজিত সিনহাই।

নাগা হোহো আৰু বিভিন্ন নাগা সংগঠনৰ ‘নিৰ্বাচনৰ পূৰ্বেই সমাধান’ আহ্বানৰ পিছত সকলো ৰাজনৈতিক দলে আগন্তুক বিধানসভা নিৰ্বাচনত প্ৰতিদ্বন্দ্বিতা কৰাৰ বাবে কোনো প্ৰাৰ্থীকে টিকট নিদিয়াৰ সিদ্ধান্ত লৈ এক যৌথ ঘোষণাপত্ৰত চহী কৰিছিল। আনহাতে বিজেপিয়ে ঘোষণাপত্ৰত চহী কৰা ৰাজ্যখনৰ দুজন নেতাক বহিষ্কাৰ কৰে।

এনে ৰাজনৈতিক পৰিস্থিতিত ৰাজ্যখনৰ বাহিৰত কোনো প্ৰাৰ্থীয়ে মনোনয়ন দাখিল কৰিব পাৰিব নেকি সোধাত বিষয়াজনে জনায় যে ৰাজ্যৰ বাহিৰত মনোনয়ন দাখিল কৰিব নোৱাৰিব।

মনোনয়ন দাখিলত বাধা পালে প্ৰাৰ্থীসকলে ৰিটাৰ্নিং বিষয়া, জিলা নিৰ্বাচন বিষয়া আৰু আৰক্ষী অধীক্ষকক অভিযোগ দিব পাৰিব বুলি বিষয়াজনে উল্লেখ কৰে।

তেওঁ ঘোষণা কৰে যে ২৭ ফেব্ৰুৱাৰিত হ’ব লগা ৰাজ্যখনৰ বিধানসভা নিৰ্বাচনৰ বাবে কাইলৈ নিৰ্বাচন অধিসূচনা জাৰি কৰা হ’ব।

তেওঁ জনায় যে মনোনয়ন দাখিলৰ বাবে ১ নং ফৰ্ম জাৰি কৰা হ’ব।

কাইলৈ অধিসূচনা জাৰি কৰাৰ পিছতে কাইলৈৰপৰা ৭ ফেব্ৰুৱাৰিলৈকে দিনৰ ১১ ৰপৰা ৩ বজালৈকে প্ৰাৰ্থীসকলে ৰিটাৰ্নিং বিষয়াৰ ওচৰত মনোনয়ন দাখিল কৰিব পাৰিব।

কহিমাত নিজৰ কাৰ্য্যালয়ত সাংবাদিকসকলক বিষয়াজনে জনাই যে এইবেলি ৰিটাৰ্নিং বিষয়াসকল হ’ব হয় অতিৰিক্ত উপায়ুক্ত নহয় মহকুমাধিপতি।

বিষয়া গৰাকীয়ে লগতে জনাই যে ইতিমধ্যে ৰাজ্যখনত নিয়োজিত হৈ থকা কেন্দ্ৰীয় সশস্ত্ৰ আৰক্ষী বাহিনীৰ মুঠ ২৮০ টা কোম্পানি নিৰ্বাচনী কৰ্তব্যৰ বাবে আহিব।