নাগা ফ্ৰেইমৱৰ্ক এগ্ৰিমেণ্ট ৰাজহুৱা কৰাৰ দাবীত টি ইউ চিৰ প্ৰতিবাদ
ভাৰত চৰকাৰ আৰু এন এছ চি এন (আই এম) ৰ মাজত স্বাক্ষৰিত নাগা ফ্ৰেইমৱৰ্ক এগ্ৰিমেণ্ট ৰাজহুৱা কৰাৰ দাবীত মণিপুৰৰ থাংমেইবান্দ ইউনাইটেড ক্লাবে (টি ইউ চি) এক প্ৰতিবাদী সভা অনুষ্ঠিত কৰে। ৭ ডিচেম্বৰৰ উক্ত প্ৰতিবাদী সভাত আনসকলৰ লগতে অভিনয় জগতৰ পৰা গৈ ৰাজনৈতিক নেতা হোৱা কাইকো হিচাপে জনাজাত আৰ কে চমেন্দ্ৰই যোগ দিয়ে।
টি ইউ চি হৈছে থাংমেইবান্দ বিধান সভা সমষ্টিৰ অন্তৰ্গত বিভিন্ন গোটৰ এক ঐক্যবদ্ধ মঞ্চ।
পুৱা ১০ বজাৰ পৰা চলা প্ৰতিবাদকালত অঞ্চলটোৰ দোকান-পোহাৰ আৰু সকলো বিলাক ব্যৱসায়িক প্ৰতিষ্ঠান বন্ধ থকাৰ লগতে যান-বাহনৰ চলাচলো বন্ধ থাকে।
প্ৰতিবাদস্থলীত কংগ্ৰেছৰ মুখপাত্ৰ তথা থাংমেইবান্দ সমষ্টিৰ বিধায়ক খুমুকশ্যাম জয়কিষাণৰ উপৰি প্ৰাক্তন চলচ্চিত্ৰ তাৰকা কাইকো, প্ৰাক্তন মুখ্য মন্ত্ৰী ৰাধা বিনোদ কৈইজাম আদিৰ দৰে বিশিষ্ট ব্যক্তিসকল উপস্থিত থাকে।
নিজৰ মন্তব্য প্ৰকাশ কৰি জয়কিষাণে কয় যে যদিও ফ্ৰেইমৱৰ্ক এগ্ৰিমেণ্ট খনে ৰাজ্যখনৰ ভৌগোলিক সীমাৰ ক্ষেত্ৰত কোনো ধৰণৰ প্ৰভাৱ নেপেলায় বুলি কৈ অহা হৈছে, তথাপি ৰাজ্যখনত দুটাকৈ পৃথক প্ৰশাসনক নিযুক্তি কৰা কাৰ্যবিধিত আশংকাৰ অৱকাশ আছে। ইয়াৰ উপৰি তেওঁ বিভিন্ন দলে কংগ্ৰেছক পাহাৰীয়া মানুহৰ বিৰোধী বুলি চলাই অহা অভিযোগক খণ্ডন কৰে। তেওঁ কয় ‘পাহাৰীয়া সমষ্টি সমূহৰ পৰা নিৰ্বাচিত হোৱা ২০ জন বিধায়কৰ ৯ জনেই কংগ্ৰেছৰ পৰা নিৰ্বাচিত হৈছে।’
মন কৰিব লগীয়া যে ৰাষ্ট্ৰপতিয়ে হৰ্নবিল উৎসৱৰ উদ্বোধনী ভাষণত অহা দুই এমাহতে নাগা চুক্তিৰ সন্দৰ্ভত এক সিদ্ধান্তত উপনীত হ’ব পৰা যাব বুলি মন্তব্য কৰিছিল। ৰাষ্ট্ৰপতিৰ উক্ত মন্তব্যক প্ৰশ্ন কৰি বিধায়ক গৰাকীয়ে কয় ‘যদিহে খচৰাখন ইতিমধ্যে প্ৰস্তুত কৰা হৈছে তেন্তে ইয়াক কিয় সংশ্লিষ্ট ৰাজ্য সমূহৰ মাজত ৰাজহুৱা কৰা হোৱা নাই।’