নাগৰিকত্ব বিধেয়ক : সৰ্থেবাৰীত কংগ্ৰেছৰ প্ৰতিবাদী সমদল, কৃষক মুক্তি-মাছৰ নাগৰিক সভা

নাগৰিকত্ব সংশোধনী বিধেয়ক বাতিলৰ দাবীত শনিবাৰে সৰ্থেবাৰীৰ ৰাজপথত কংগ্ৰেছে প্ৰতিবাদ সাৱ্যস্ত কৰে। সৰুক্ষেত্ৰী ব্লক কংগ্ৰেছৰ উদ্যোগত এই বিধেয়ক বাতিলৰ দাবীত সৰ্থেবাৰীৰ সভা খলাৰ পৰা সৰ্থেবাৰী ৰাজহ চক্ৰ বিষয়াৰ কাৰ্যালয়লৈ এটি প্ৰতিবাদী সমদল উলিওৱা হয়।

প্ৰতিবাদী সমদলৰ নেতৃত্ব দিয়ে সৰুক্ষেত্ৰী ব্লক কংগ্ৰেছৰ সভাপতি শান্ত কুমাৰ দাস আৰু পাকা বেতবাৰী ব্লক কংগ্ৰেছৰ সভাপতি দিলোৱাৰ হুছেইনে। স্থানীয় বিধায়ক জাকিৰ হুছেইন শিকদাৰেও প্ৰতিবাদী কাৰ্যসূচীত অংশগ্ৰহণ কৰে। প্ৰায় তিনি শতাধিক কংগ্ৰেছ কৰ্মীয়ে এই প্ৰতিবাদী সমদলত অংশগ্ৰহণ কৰে।

সমদলটো চক্ৰ বিষয়াৰ কাৰ্যালয়ৰ সন্মুখত উপস্থিত হোৱাৰ পিছত বিধায়ক জাকিৰ হুছেইন শিকদাৰৰ লগতে কেইবাজনো কংগ্ৰেছ নেতাই ভাষণ দিয়ে। আতিকুৰ ৰহমান, বাবুল আলী,মামুল আলী, ইয়াছফুৰ আলী, লুতফৰ ৰহমান আদি কেইবাগৰাকী কংগ্ৰেছৰ নেতাই ভাষণ দিয়ে।

প্ৰতিবাদকাৰী সমদলৰ নেতৃত্বই চক্ৰ বিষয়াৰ কাৰ্যালয়ৰ জৰিয়তে যুটীয়া সংসদীয় সমিতিৰ অধ্যক্ষলৈ বিতৰ্কিত বিধেয়খন বাতিলৰ দাবীৰেএখন স্মাৰক-পত্ৰ প্ৰেৰণ কৰে।

আনহাতে, সৰুক্ষেত্ৰী আঞ্চলিক কৃষক মুক্তি সংগ্ৰাম সমিতি আৰু মাছৰ যুটীয়া উদ্যোগত সৰ্থেবাৰীৰ লচিমাস্থিত পঞ্চগ্ৰাম প্ৰগতি সামূহিক কেন্দ্ৰত এখন নগৰিক সভা অনুষ্ঠিত হয়।

মাছৰ উপদেষ্টা আদিত্য লহকৰৰ সভাপতিত্বত অনুষ্ঠিত সভাত অংশ লৈ সদৌ অসম সাংবাদিক সন্থাৰ সাধাৰণ সম্পাদক নকুল তালুকদাৰে জাতিধ্বংসী নাগৰিকত্ব সংশোধনী বিধেয়কৰ বিৰূপ প্ৰভাৱ সম্পৰ্কে ব্যাখ্যা আগবঢ়ায়। তেওঁ বিধেয়কখনৰ বিৰুদ্ধে প্ৰবল জনমত গঢ়ি তোলাৰ বাবে ৰাইজক আহ্বান জনায়।

অগপ নেতা তথা অধিবক্তা চিত্তৰঞ্জন বৰ্মন, কৃষক নেতা দণ্ডিনাথ বৰ্মন, সাংবাদিক হৰমোহন বৰ্মন, অৱসৰপ্ৰাপ্ত শিক্ষক ৰূপধন বৰ্মন, ধৰ্মেশ্বৰ নায়ক, জীৱেশ্বৰ তালুকদাৰ, কমলেশ্বৰ মেধি আদি কেইবাজনো ব্যক্তিয়ে বিধেয়কখনৰৰ বিৰোধিতা কৰি ভাষণ আগবঢ়ায়।