নাগৰিকত্ব সংশোধনী বিধেয়ক বাতিলৰ দাবীত তেজপুৰত সাংবাদিকৰ প্ৰতিবাদ

ৰাজ্যজুৰি নাগৰিকত্ব সংশোধনী বিধেয়কৰ বিৰুদ্ধে অব্যাহত  আছে প্ৰতিবাদ- বিক্ষোভৰ জুই। ইয়াৰ মাজতে মঙলবাৰে তেজপুৰত শোনিতপুৰ জাৰ্নেলিষ্ট ইউনিয়নৰ আহ্বানত প্ৰায় সহস্ৰাধিক লোকে বিতৰ্কিত এই বিভেয়কখনৰ বিৰুদ্ধে তীব্ৰ প্ৰতিবাদ সাব্যস্ত কৰে।

প্ৰতিবাদকাৰী সকলে তেজপুৰৰ আদালত চাৰিআলিত সমৱেত হৈ প্ৰতিবাদ সাব্যস্ত কৰি ‘সৰ্বানন্দ সোণোৱাল মুৰ্দাবাদ’, ‘বিজেপি গ’ বেক’, ‘নৰেন্দ্ৰ মোডী হুচিয়াৰ’, ‘বিজেপি চৰকাৰ হুচিয়াৰ’ আদি প্ৰতিবাদী শ্ল’গানেৰে ৰাজপথ উত্তাল কৰাৰ লগতে বেনাৰ- প্লেকাৰ্ড প্ৰদৰ্শন কৰি প্ৰতিবাদ সাব্যস্ত কৰে।

প্ৰতিবাদকাৰীয়ে নাগৰিকত্ব সংশোধনী বিধেয়ক ২০১৬ৰ তীব্ৰ বিৰোধিতা কৰাৰ লগতে এই ক্ষেত্ৰত অসম চৰকাৰ তথা মুখ্যমন্ত্ৰী সৰ্বানন্দ সোণোৱালৰ ভূমিকাক কঠোৰ ভাষাৰে সমালোচনা কৰি অতি শীঘ্ৰে ৰাজ্য চৰকাৰক এই বিতৰ্কিত বিধেয়কখন বাতিল কৰিবলৈ দাবী জনায়।

উল্লেখযোগ্য যে বিগত কিছুদিন ধৰি অসমৰ বিভিন্ন দল-সংগঠন, শিল্পী- সাহিত্যিক, বুদ্ধিজীৱী, সাংবাদিক, জ্যেষ্ঠ নাগৰিক, গায়ক, অভিনেতা- অভিনেত্ৰী, ছাত্ৰ-ছাত্ৰী ৰাজপথলৈ ওলাই আহি বিতৰ্কিত বিধেয়কখনৰ বিৰুদ্ধে প্ৰতিবাদ সাব্যস্ত কৰিছে। সম্প্ৰতি সমাজৰ সৰ্বস্তৰৰ লোক সৰৱ হৈ পৰিছে বিজেপি

চৰকাৰৰ অসম ধ্বংসকাৰী সিদ্ধান্তৰ বিৰুদ্ধে৷ নাগৰিক সংশোধনী বিধেয়ক বাতিলৰ দাবীত ৰাজপথলৈ ওলাই আহি গৰজি উঠিছে ৰাইজ৷ ইয়াৰ মাজতে তেজপুৰত সাংবাদিকৰ প্ৰতিবাদ যথেষ্ট গুৰুত্বপূৰ্ণ।