নাগৰিকপঞ্জীৰ চূড়ান্ত খচৰা : তৎপৰ বিশ্বনাথ,গহপুৰ প্ৰশাসন
শীঘ্রেই প্ৰকাশ পাবলগীয়া এন আৰ চিৰ সম্পূৰ্ণ খচৰা সম্পৰ্কত সৰ্বসাধাৰণক সজাগ কৰি তোলাৰ উদ্দেশ্যেৰে বিশ্বনাথ জিলা প্ৰশাসন আৰু গহপুৰ মহকুমা প্ৰশাসনে ব্যাপক সজাগতা অভিযান আৰম্ভ কৰিছে।
যোৱা দুদিনত জিলাখনৰ বিভিন্ন প্ৰান্তত এন আৰ চি বিষয়ক কেইবাখনো সজাগতা সভা অনুষ্ঠিত কৰা হৈছে। জিলা আৰু মহকুমা প্ৰশাসনে জিলাখনৰ বিভিন্ন হাট-বজাৰ, চেণ্টাৰ আদি জনসমাগম হোৱা স্থানত হৰ্ডিং আৰু পোষ্টাৰ অঁৰা, মাইকেৰে প্ৰচাৰ চলোৱা, ৰাইজৰ মাজত পুস্তিকা বিতৰণ কৰা আদি কাৰ্যসূচী ব্যাপকভাৱে ৰূপায়ণ কৰিছে।
প্ৰচাৰ কাৰ্যৰ বাবে বিশেষভাৱে সজ্জিত দুখন বাহনো সাজু কৰি তোলা হৈছে। জনসচেতনতা কাৰ্যসূচীৰ অংশ হিচাপেই কালি গহপুৰ আৰু হেলেম ৰাজহ চক্ৰৰ অধীনৰ গাওঁবুঢ়াসকল আৰু গাওঁৰক্ষী বাহিনীৰ সভাপতি-সম্পাদকসকলৰ সৈতে প্ৰশাসন দুখন সুকীয়া বৈঠকত মিলিত হয়।
বিশ্বনাথ জিলা প্ৰশাসন আৰু সংশ্লিষ্ট ৰাজহ চক্ৰ দুটাৰ উদ্যোগত অনুষ্ঠিত এই দুয়োখন সভাতে অতিৰিক্ত উপায়ুক্ত তথা গহপুৰৰৰ ভাৰপ্ৰাপ্ত মহকুমাধিপতি ডঃ ইন্দ্ৰানসী দাস উপস্থিত থাকে।
আৰক্ষী অধীক্ষক, মহকুমা আৰক্ষী বিষয়া, ৰাজহ চক্ৰ বিষয়া, স্থানীয় থানাৰ ভাৰপ্ৰাপ্ত বিষয়া আদিৰ উপস্থিতিত অনুষ্ঠিত এই সভাকেইখনত এন আৰ চিৰ খচৰা তালিকা সন্দৰ্ভত ৰাইজৰ মাজত সজাগতা সৃষ্টিত সহায় কৰিবলৈ গাওঁবুঢ়াসকল আৰু গাওঁৰক্ষী বাহিনীৰ সভাপতি–সম্পাদকসকলক অনুৰোধ জনোৱা হয়।
তেওঁলোকক প্ৰতিমুহূৰ্ত্ততে সজাগ হৈ থাকিবলৈ কোৱাৰ লগতে শীঘ্রই প্ৰকাশ পাবলগীয়া এন আৰ চিৰ সম্পূৰ্ণ খচৰাত কাৰোবাৰ নাম বাদ পৰিলেও যে কোনো চিন্তাৰ কাৰণ নাই, সেই কথা ৰাইজক বুজাই আশ্বস্ত কৰাৰ দায়িত্বও তেওঁলোকৰ ওপৰত ন্যস্ত কৰা হয়।
উল্লেখযোগ্য যে বিশ্বনাথ জিলাৰ ৬টা এন আৰ চি সেৱা কেন্দ্ৰক অতি স্পৰ্শকাতৰ আৰু ২৩টা কেন্দ্ৰক স্পৰ্শকাতৰ হিচাপে চিহ্নিত কৰা হৈছে। এই কেন্দ্ৰসমূহত উদ্ভৱ হ’ব পৰা যিকোনো পৰিস্থিতি নিয়ন্ত্ৰণৰ বাবে পৰ্যাপ্ত নিৰাপত্তা ব্যৱস্থা হাতত লোৱা হৈছে।
যিকোনো আইন-শৃংখলাজনিত পৰিস্থিতিৰ উদ্ভৱ হ’লে আৰক্ষী নিয়ন্ত্ৰণ কক্ষৰ ফোন নম্বৰ-৮১৩৫৮৩৭৬১৪ত যোগোযোগ কৰিবলৈ জিলাৰ আৰক্ষী অধীক্ষকে ইতিমধ্যেই ৰাইজলৈ আহ্বান জনাইছে।
কালিৰ এই সভাকেইখনত হেলেম আৰু গহপুৰ ৰাজহ চক্ৰৰ অধীনৰ প্ৰায়বোৰ গাঁৱৰে গাওঁবুঢ়া আৰু গাওঁৰক্ষী বাহিনীৰ সভাপতি-সম্পাদকসকলৰ উপৰি স্থানীয় ৰাইজো উপস্থিত থাকে।