‘নিজৰ যত্ন অবিহনে নিৰোগী জীৱন অবান্তৰ বিষয়’- জিএমচিৰ অধ্যক্ষ ডাঃ অতীন্দ্ৰ কুমাৰ অধিকাৰী
ৰাজ্যৰ আগশাৰীৰ চিকিৎসা সেৱা প্ৰতিষ্ঠান ছানভেলী ডায়েবেটিক কেয়াৰ এণ্ড ৰিচাৰ্ছ চেণ্টাৰ আৰু চানভেলী হস্পিতালৰ ১৫ তম বৰ্ষপূৰ্তি উপলক্ষে শুকুৰবাৰে গুৱাহাটীস্থ চিকিৎসালয় প্ৰাংগনত আয়োজিত দিনজোৰা কাৰ্যসূচীৰ মুকলি অনুষ্ঠানত মুখ্য অতিথি হিচাপে অংশগ্ৰহণ কৰে বিশিষ্ট চিকিৎসক ডাঃ অতীন্দ্ৰ কুমাৰ অধিকাৰীয়ে। ২০০৩ চনতে পূৰ্ণাংগ মধুমেহ চিকিৎসা কেন্দ্ৰ হিচাপে আৰম্ভ কৰা চিকিৎসালয়খনে সুদীৰ্ঘ ডেৰ দশকৰ পৰিক্ৰমা সম্পূৰ্ণ কৰে শুকুৰবাৰৰ দিনটোত।
অনুষ্ঠানৰ মুকলি সভাত মুখ্য অতিথি হিচাপে অংশগ্ৰহণ কৰি বিশিষ্ট চিকিৎসক ডাঃ অতীন্দ্ৰ কুমাৰ অধিকাৰীয়ে কয়, ‘’এটা দীৰ্ঘস্থায়ী সুস্থ জীৱনৰ বাবে চিকিৎসক নহয়, নিজৰ যত্নহে সৰ্বোপৰি। নিজৰ যতন অবিহনে নিৰোগী শৰীৰ অবান্তৰ বিষয়। এইক্ষেত্ৰত সজাগতা সৃষ্টিৰ বাবে চানভেলী হস্পিতালে প্ৰতিদিনেই চেষ্টা কৰি আহিছে।‘’ অনুষ্ঠানত ডাঃ অধিকাৰীৰ লগতে হাস্পতালৰ অধ্যক্ষ ড০ ৰাজেন্দ্ৰ নাথ পাঠক, সঞ্চালক ক্ৰমে দ্বিপেন শৰ্মা, এ পাঠক, সুস্মিতা মজুমদাৰ, ডাঃ বিকাশ ভট্টাচাৰ্য আৰু প্ৰভাস চৌধুৰীও উপস্থিত থাকে।
১৫ তম বৰ্ষপূৰ্তি উপলক্ষে পুৱাৰ ভাগতে সাধাৰণ ৰাইজৰ বাবে এক বিনামূলীয়া মধুমেহ পৰীক্ষা শিবিৰ আৰু বিনামূলীয়া বৃ্ক্ক (কিড্নী) পৰীক্ষা শিবিৰৰ আয়োজন কৰা হয়। ইয়াত প্ৰায় দুই শতাধিক লোকে অংশগ্ৰহণ কৰে। দুয়োটা চিকিৎসাৰ ক্ষেত্ৰত বাটকটীয়া হিচাপে অৱতীৰ্ণ হোৱা চিকিৎসালয়খনে সমগ্ৰ উত্তৰ-পূবৰ চিকিৎসাক্ষেত্ৰত এক বিশেষ স্থান অধিকাৰ কৰিবলৈ সক্ষম হৈছে।
উল্লেখ্য যে সম্প্ৰতি ৫০খন বিচনাযুক্ত চানভেলী হস্পিতালত আছে প্ৰায় সকলো ধৰণৰ চিকিৎসা সুবিধা। অত্যাধুনিক আইচিইউ, তিনিটাকৈ অস্ট্ৰোপচাৰ কক্ষৰ লগতে অভিজ্ঞ চিকিৎসকৰে সুসজ্জিত চিকিৎসালয়খনে মধুমেহ বিশেষ মাল্টিস্পেচিয়েলিটি হাস্পিতাল হিচাপে সুনাম অৰ্জন কৰিছে।
শেহতীয়াকৈ চিকিৎসালয়খনৰ বিশিষ্ট চিকিৎসক তথা ভৰিৰ শল্য চিকিৎসক ডাঃ সুধীৰ কুমাৰ জৈনৰ প্ৰচেষ্টাত আৰম্ভ কৰা হৈছে ‘চৰণ স্পৰ্শ’ নামৰ এক অভিলাসী প্ৰকল্প। তদুপৰি চিকিৎসালয়খনৰ নিজাববীয়া প্ৰচেষ্টাতে ২৩ এপ্ৰিলৰ দিনটোক ডায়েবেটিক ফুট ডে হিচাপে পালন কৰিবলৈ আৰম্ভ কৰা হৈছে।