নিমাতী সুৰক্ষাত অসম চৰকাৰৰ ব্যৰ্থতাৰ প্ৰতিবাদত আছুৰ অৱস্থান ধৰ্মঘট
আছুৱে বৃহস্পতিবাৰে নিমাতী ঘাটক ৰক্ষা কৰাৰ দাবীত প্ৰতিবাদ সাব্যস্ত কৰে।
মন কৰিব লগীয়া যে মাজুলীৰ পৰা যোৰহাটলৈ আহ-যাহ কৰা একমাত্ৰ সম্বল হ’ল নিমাতী ঘাট৷ কিন্তু বৰ্তমান সংকটৰ গৰাহত পৰিছে এই নিমাতী ঘাট যাক ৰক্ষা কৰাৰ দাবীত বহস্পতিবাৰে আছুৱে প্ৰতিবাদ সাব্যস্ত কৰিবলৈ বাধ্য হয়।
অগপ, বিজেপি বিপিএফ মিত্ৰজোঁটে চৰকাৰ গঠন কৰিয়েই সত্ৰনগৰী মাজুলীৰ উন্নয়ন, নিমাটি ঘাটৰ উন্নয়নৰ বাবে বহু প্ৰতিশ্ৰুতি প্ৰদান কৰিছিল যদিও বিজেপি চৰকাৰে এই প্ৰতিশ্ৰুতি পূৰণত ব্যৰ্থ হয়। সম্প্ৰতি ঘাটটো গৰাখহনীয়াৰ কবলত পৰি স্থানীয় ৰাইজৰ আতংকৰ কাৰণ হৈ পৰিছে।
আনহাতে নিমাতী সুৰক্ষাত অসম চৰকাৰৰ ব্যৰ্থতাৰ প্ৰতিবাদত সদৌ যোৰহাট জিলা ছাত্ৰ সন্থাই পূব যোৰহাট আঞ্চলিক ছাত্ৰ সন্থাৰ সহযোগত নিমাতী ঘাটত অৱস্থান ধৰ্মঘট কাৰ্যসূচী ৰূপায়ণ কৰি প্ৰতিবাদ সাব্যস্ত কৰে৷ কাৰ্যসূচীত আছুৰ কেন্দ্ৰীয়, জিলাৰ নেতা উপস্থিত থাকি ৰাজ্য চৰকাৰক তীব্ৰ সমালোচনা কৰি শীঘ্ৰে নিমাতীক ৰক্ষা কৰাৰ বাবে কাম কাজ আৰম্ভ কৰাৰ দাবী জনায়৷