নিৰ্বাচনৰ প্ৰাক ক্ষণত গাৰো পাহাৰত বিজেপিৰ নেতাৰ দল ত্যাগ

মেঘালয় বিজেপিক অস্বস্তিত পেলাই আজি গাৰো পাহাৰৰ এজন প্ৰাৰ্থিত্ব প্ৰত্যাশী বিজেপি নেতাই তেওঁৰ সমৰ্থকৰ সৈতে বিজেপি ত্যাগ কৰিছে। জেন আৰেং নামৰ এই নেতাজনে উইলিয়াম নগৰ বিধানসভা সমষ্টিত বিজেপিৰ পৰা টিকট বিচাৰিছিল বুলি এটা সূত্ৰই জানিবলৈ দিছে।

সূত্ৰটোৱে কোৱা মতে উক্ত সমষ্টিৰ পৰা বিজেপিয়ে সন্তোষ মাৰাকক টিকট দিছে। ইয়াকে লৈ ভীষণ অসন্তুষ্ট জেন আৰেঙে তেওঁৰ সমৰ্থকসকলক লৈ দল ত্যাগ কৰে।

সূত্ৰটোৱে জানিবলৈ দিয়ে যে নেতাজনে তেওঁৰ লগতে তেওঁৰ সমৰ্থকৰো স্বাক্ষৰসহ পদত্যাগ পত্ৰ  ৰাজ্যিক সভাপতি শ্বিবুন লিংডোৰ হাতত ৩ ফেব্ৰুৱাৰিত অৰ্পণ কৰে। পত্ৰখনত তেওঁ ব্যক্তিগত কাৰণত দল ত্যাগ কৰা বুলি কোৱা হৈছে।

উল্লেখযোগ্য যে আৰেং বিজেপিৰ গাৰো পাহাৰ জিলাৰ সভাপতিও আছিল। কিন্তু যোৱা বছৰৰ প্ৰথম ভাগতে তেওঁক সেই পদৰ পৰা আঁতৰোৱা হৈছিল আৰু তেওঁৰ ঠাইত ৰাকেশ মাৰাকক বহুওৱা হৈছিল।

আনহাতে সূত্ৰটোৱে কয় যে আৰেঙে আন কোনো দলত যোগদান কৰিব নে নকৰে বা নিৰ্দলীয় হিচাপে নিৰ্বাচনত প্ৰতিদ্বন্দ্বিতা কৰিব নে নকৰে সেই কথা এতিয়াও নিশ্চিত কৰা নাই।