ন্যায়াধীশ ৰঞ্জন গগৈলৈ ‘জাতীয় চহিদ মুক্তিনাথ গোৱালা সোঁৱৰণী শ্ৰেষ্ঠ অসমীয়া বঁটা’ আগবঢ়াইছে কৃষক মুক্তিয়ে

উচ্চতম ন্যায়ালয়ৰ ন্যায়াধীশ ৰঞ্জন গগৈলৈ ‘জাতীয় চহিদ মুক্তিনাথ গোৱালা সোঁৱৰণী শ্ৰেষ্ঠ অসমীয়া বঁটা’ আগবঢ়াইছে কৃষক মুক্তি সংগ্ৰাম সমিতিয়ে।

প্ৰথমবাৰৰ বাবে আগবঢ়াব লগা এই বঁটাটো ২০১৭-১৮ বৰ্ষৰ বাবে গগৈলৈ আগবঢ়োৱাৰ কথা আজি ৩১ জুলাইত ঘোষণা কৰে কৃষক মুক্তিৰ নেতা অখিল গগৈয়ে।

‘দেশৰ ন্যায় ব্যৱস্থা আৰু ৰাজ্যলৈ আগবঢ়োৱা বৃহৎ বৰঙনিৰ বাবে আমি ন্যায়াধীশ ৰঞ্জন গগৈলৈ এই বঁটা আগবঢ়াব খুজিছো,’ গগৈলৈ বঁটাটো আগবঢ়োৱাৰ সম্পৰ্কে ক’বলৈ গৈ মন্তব্য গগৈৰ।

ন্যায়াধীশ হিচাপে দায়িত্বত থকা অৱস্থাত বঁটাটো নোলোৱাৰ সম্ভাৱনা সন্দৰ্ভত অখিল গগৈয়ে কয় ‘ন্যায়াধীশ গগৈয়ে বঁটাটো গ্ৰহণ নকৰিবও পাৰে। কিন্তু আমি সিদ্ধান্ত কৰিছো যে তেওঁৰ বাহিৰে আন কালৈও আমি এই বঁটাটো আগনবঢ়াও।’

এন আৰ চি উন্নীতকৰণৰ ক্ষেত্ৰত ন্যায়াধীশ ৰঞ্জন গগৈ আৰু ৰোহিন্টন নৰিমনে লোৱা ভূমিকাৰো শলাগ লয় কৃষক মুক্তিয়ে।

বঁটাটো কেতিয়াকৈ প্ৰদান কৰা হ’ব ঘোষণা কৰা নাই যদিও ন্যায়াধীশগৰাকীলৈ আজি ৩১ জুলাইত এই সন্দৰ্ভত ই মে’ইল প্ৰেৰণ কৰা হৈছে বুলি জনাইছে সংগঠনটোৱে।

অখিল গগৈয়ে জনোৱা মতে বঁটাটোত নগদ ১ লাখ টকা, এখন মান পত্ৰ, এখন চেলেং চাদৰ আৰু এটা স্মাৰক আগবঢ়োৱা হ’ব। ‘কৃষক মুক্তিৰ কৃষক, ছাত্ৰ আৰু আন সকলো শাখাৰ কৰ্মীয়ে বঁটাটোৰ বাবে প্ৰয়োজনীয় ধনখিনি সংগ্ৰহ কৰিব,’ গগৈয়ে জনায়।

কৃষক মুক্তিয়ে এইবাৰৰ পৰা প্ৰতিবছৰে এই বঁটাটো আগবঢ়াব বুলি গগৈয়ে ঘোষণা কৰে।

গুৱাহাটীত অনুষ্ঠিত এক কাৰ্য্যনিৰ্বাহক বৈঠকত ভাগ লৈ ঘূৰি যোৱাৰ পথত যোৱা ২০১৭ চনত বোকাখাতত এক পথ দুৰ্ঘটনাত চাহ শ্ৰমিক মুক্তি সংগ্ৰাম সমিতিৰ প্ৰতিষ্ঠাপক সম্পাদক মুক্তিনাথ গোৱালাৰ মৃত্যু হৈছিল।