পথৰুঘাটতৰ ছহিদক সুঁৱৰি মঙলদৈত ‘কৃষক ছহিদ দিৱস’ৰ আয়োজন

১৮৯৪ চনৰ ২৮ জানুৱাৰিত ঐতিহাসিক পথৰুঘাটত সংঘটিত কৃষক বিদ্ৰোহৰ ছহিদসকলক সুঁৱৰি দেওবাৰে মঙলদৈত ‘কৃষক ছহিদ দিৱস’ৰ আয়োজন কৰা হয়।

উল্লেখযোগ্য যে মাটিৰ খাজনা বৃদ্ধিৰ প্ৰতিবাদত বৃটিছৰ বিৰুদ্ধে বিদ্ৰোহ কৰিবলৈ ওলাই অহা প্ৰায় ১৫০জন কৃষকক বৃটিছ সেনাই ১৮৯৪ চনৰ আজিৰ দিনটোত গুলীয়াই হত্যা কৰিছিল।

যোৱা বছৰ মুখ্য মন্ত্ৰী সৰ্বানন্দ সোণোৱালে উক্ত দিনটো চৰকাৰী ভাবে উদযাপন কৰা হ’ব বুলি ঘোষণা কৰাৰ পিছত এইবাৰ দৰং জিলা প্ৰশাসনে পাথৰিঘাট ছহিদ বেদীত আজি দিনজোৰা কাৰ্যসূচীৰে শ্ৰদ্ধাঞ্জলি অনুষ্ঠানৰ আয়োজন কৰে।

মঙলদৈৰ বিধায়ক গুৰু জ্যোতি দাসে কয় যে পাথৰিঘাট এটিয়াও উপেক্ষিত হৈ আছে, অৱশ্যে বৰ্তমানৰ চৰকাৰে অঞ্চলটোৰ উন্নয়নৰ বাবে কেইবাখনো আঁচনি হাতত লৈছে আৰু কৃষি প্ৰশিক্ষণ কেন্দ্ৰৰ কাৰণে পুঁজি মুকলি কৰি দিছে।

সভাত উপস্থিত ৰাইজক সম্বোধন কৰি ছিপাঝাৰৰ বিধায়ক বিনন্দ কুমাৰ শইকীয়াই পথৰুঘাটৰ ৰণক ৰাষ্ট্ৰীয় তথা আন্তৰাষ্ট্ৰীয় পৰ্যায়লৈ লৈ যোৱাৰ উপৰত গুৰুত্ব আৰোপ কৰে। তেওঁ অদূৰ ভৱিষ্যতত ঠাইখনলৈ ভাৰতৰ ৰাষ্ট্ৰপতি বা উপ ৰাষ্ট্ৰপতিৰ ভ্ৰমণ নিশ্চিত কৰে।

বিধায়ক গৰাকীয়ে ঐতিহাসিক পাথৰিঘাটৰ উন্নয়ন সাধন কৰা হ’ব বুলি পূৰ্বৰ কংগ্ৰেছ তথা অগপ চৰকাৰে দিয়া ভুৱা আশ্বাসক তীব্ৰ সমালোচনা কৰে।

আনহাতে অসম জাতিয়তাবাদী যুৱ ছাত্ৰ পৰিষদৰ মুখ্য উপদেষ্টা ভৱেশ কাকটিয়ে ৰাজ্য চৰকাৰক কৃষক ছহিদ সকলৰ সন্মানাৰ্থে এখন কৃষি মহাবিদ্যালয় স্থাপনৰ দাবী জনাই।

আছুৰ নেতা খনিন্দ্ৰ ৰাজবংশীয়ে কয় যে এই ঠাই টুকুৰা উপেক্ষিত হৈ আছে আৰু চৰকাৰে ঠাইখিনি উন্নয়নৰ বাবে এতিয়াও গুৰুত্ব প্ৰদান কৰা নাই।

উক্ত অনুষ্ঠানটোত পথৰুঘাট কৃষক বিদ্ৰোহৰ ওপৰত ৰচিত গীতৰ গীতিকাৰ মাধৱ শৰ্মাক ৰাজহুৱাভাৱে সম্বৰ্ধনা জনোৱা হয়। ইয়াৰ লগতে বিশিষ্ট বাঁহী বাদক দীপক শৰ্মাই অনুষ্ঠান পৰিৱেশন কৰে ।