প্ৰধান মন্ত্ৰী মোদীয়ে আজি অৰুণাচল প্ৰদেশ আৰু ত্ৰিপুৰা ভ্ৰমণ কৰিব
আজি অৰুণাচল প্ৰদেশৰ ৰাজধানী ইটানগৰলৈ আহিব প্ৰধান মন্ত্ৰী নৰেন্দ্ৰ মোদী। প্ৰধান মন্ত্ৰী গৰাকীয়ে ইটানগৰৰ আই জি পাৰ্কত নৱনিৰ্মিত অত্যাধুনিক দৰ্জী খাণ্ডু ৰাজ্যিক সভাকেন্দ্ৰটো উদ্বোধন কৰিব।
বিভাগীয় সূত্ৰৰ পৰা জানিব পৰা মতে প্ৰধান মন্ত্ৰী গৰাকীয়ে দৰ্জী খাণ্ডু ৰাজ্যিক সভাকেন্দ্ৰটো উদ্বোধন কৰাৰ উপৰি টোমো ৰিবা ইনষ্টিটিউট অব হেল্থ এণ্ড মেডিকেল ছায়েন্সৰ আধাৰশিলা স্থাপন কৰাৰ লগতে ৰাজ্যিক সচিবালয় ভৱনটো দেশৰ নামত উৎসৰ্গীত কৰিব।
প্ৰধান মন্ত্ৰী গৰাকীৰ ভ্ৰমণক কেন্দ্ৰ কৰি অৰুণাচল প্ৰশাসনে ইটানগৰত নিৰাপত্তা ব্যৱস্থা কটকটীয়া কৰি তুলিছে।
আনহাতে অৰুণাচল প্ৰদেশ কংগ্ৰেছ কমিটীয়ে ৰাজ্যখনত সংঘটিত বিভিন্ন দুৰ্নীতিৰ চিবিআইৰ তদন্ত বিচাৰি প্ৰধান মন্ত্ৰীক সাক্ষৎ কৰি এখন স্মাৰক-পত্ৰ প্ৰদান কৰিব বুলি অৰুণাচল প্ৰদেশ কংগ্ৰেছ কমিটীৰ সাধাৰণ সম্পাদক কেনটা কামলিয়ে সংবাদ মাধ্যমলৈ প্ৰেৰণ কৰা এক বিবৃবিতত জানিবলৈ দিয়ে।
অৰুণাচলত দিনটোৰ কাৰ্যসূচী সামৰি প্ৰধান মন্ত্ৰী মোদী ত্ৰিপুৰালৈ ৰাওনা হ’ব।
১৮ ফেব্ৰুৱাৰিত অনুষ্ঠিত হ’ব লগীয়া আসন্ন বিধানসভা নিৰ্বাচনৰ বাবে ৰাজ্যখনলৈ আহিব লগীয়া মোদীয়ে আজি আগৰটলা আৰু শান্তি বজাৰৰ দুখন নিৰ্বাচনী সমাবেশক সম্বোধন কৰিব।