ফেব্ৰুৱাৰিত অনুষ্ঠিত হ’ব দ্বিতীয় সংখ্যক ব্ৰহ্মপুত্ৰ সাহিত্য উৎসৱ

দ্বিতীয় সংখ্যক ব্ৰহ্মপুত্ৰ সাহিত্য উৎসৱৰ আয়োজন কৰিবলৈ সম্পূৰ্ণৰূপে সাজু হৈ উঠিছে গুৱাহাটী। ফেব্ৰুৱাৰিৰ ৯ৰ পৰা ১১ তাৰিখলৈ পাঞ্জাবাৰীস্থিত শ্ৰীমন্ত শংকৰদেৱ কলাক্ষেত্ৰত অনুষ্ঠিত হ’ব এই সাহিত্য উৎসৱৰ।

উক্ত সাহিত্য উৎসৱত বিশ্বৰ আগশাৰীৰ মুঠ ১২০গৰাকী সাহিত্যিক তথা সাহিত্যক্ষেত্ৰৰ লগত জড়িত ব্যক্তি উপস্থিত থাকিব।

অসম প্ৰকাশন পৰিষদ আৰু নেশ্যনেল বুক ট্ৰাষ্টৰ যৌথ উদ্যোগত এই উৎসৱৰ আয়োজন কৰা হৈছে।

‘এই উৎসৱ উত্তৰ-পূবৰ লগতে ভাৰতৰ ভিতৰতে এটা সৰ্ববৃহৎ সাহিত্য উৎসৱ হিচাপে পৰিগণিত হ’ব। আমাৰ এই দ্বিতীয় সংখ্যক সাহিত্য উৎসৱত স্থানীয় সাহিত্যপ্ৰেমীৰ মাজত উৎসাহ উদ্দীপনা তথা কিছু জ্ঞান আহৰণৰ বাবে বিশ্বৰ আগশাৰীৰ বিশিষ্ট ব্যক্তিসকলক আমন্ত্ৰণ জনোৱা হৈছে’, প্ৰকাশন পৰিষদৰ বিষয়ববীয়াই এনেদৰে সংবাদ মাধ্যমৰ আগত কয়।

এই উৎসৱতে বিশিষ্ট সাহিত্যিকসকলৰ লগত মত বিনিময় তথা আলোচনা কৰিবৰ বাবে মহাবিদ্যালয়ৰ ছাত্ৰ-ছাত্ৰী তথা শিক্ষক সকলকো আমন্ত্ৰণ জনোৱা হৈছে বুলি উদ্যোক্তাই জানিবলৈ দিয়ে।

‘ছাত্ৰ-ছাত্ৰী তথা শিক্ষকসকলে বিশিষ্ট ব্যক্তিকেইগৰাকীৰ পৰা অভিজ্ঞতা, কৰ্মৰাজীৰ বিষয়ে মত বিনিময় কৰি ওচৰৰ পৰা জানিবলৈ সুবিধা লাভ কৰিব’, এইদৰে কয় উদ্যোক্তাই।

উল্লেখযোগ্য যে আয়োজক গোষ্ঠীয়ে ৰাজস্থানৰ জয়পুৰ সাহিত্য উৎসৱৰ দৰে ব্ৰহ্মপুত্ৰ সাহিত্য উৎসৱকো বিশ্ব দৰবাৰত এখন উল্লেখযোগ্য সাহিত্য উৎসৱ হিচাপে প্ৰতিষ্ঠিত কৰাৰ পোষকতা কৰিছে।