বটদ্ৰৱাৰ এন আৰ চি কেন্দ্ৰত লেপটপ চুৰি; আৰক্ষীৰ দুৰ্ব্যৱহাৰৰ প্ৰতিবাদত কাম বন্ধ কৰিলে কৰ্মচাৰীয়ে

নগাঁও জিলাৰ বটদ্ৰৱা বিধানসভা সমষ্টিৰ অন্তৰ্গত দলংঘাট উন্নয়ন খণ্ডস্থিত এন আৰ চি ( NRC ) কেন্দ্ৰত আজি ১৮ মে’ত এক উত্তেজনাপূৰ্ণ পৰিস্থিতিৰ সৃষ্টি হয়। কেন্দ্ৰটোত ব্যৱহৃত এটা লেপ টপ চুৰি হোৱা ঘটনাক কেন্দ্ৰ কৰি উদ্ভৱ হয় এই অনাহুত পৰিস্থিতি।

প্ৰাপ্ত খবৰ অনুসৰি, বৃহস্পতিবাৰে পুৱা দলংঘাট উন্নয়ন খণ্ডস্থিত পাঘালী এন আৰ চি সেৱাকেন্দ্ৰলৈ কৰ্ম সম্পাদনৰ বাবে আহি নিয়োজিত কৰ্মীয়ে কাৰ্যালয়ৰ কামত ব্যৱহৃত এটা লেপটপ বিচাৰি নোপোৱাত হৈ চৈ লাগে। লগে লগে উক্ত লেপটপটো চুৰি হোৱা বুলি সন্দেহ কৰি সংশ্লিষ্ট বৰিবজাৰ আৰক্ষীক লিখিত এজাহাৰ দাখিল কৰে কেন্দ্ৰটোৰ কৰ্তৃপক্ষই।

পৰৱৰ্তী সময়ত আৰক্ষীয়ে তদন্ত কাৰ্য আৰম্ভ কৰে যদিও এজাহাৰ দিবলৈ যোৱা এন আৰ চি কৰ্মীকেইজনক থানাত অশ্ৰাব্য গালি-গালাজ আৰু দুৰ্ব্যৱহাৰ কৰি নিশা ২ বজাপৰ্যন্ত হাৰাশাস্তি চলাই বুলি অভিযোগ উত্থাপন কৰিছে কৰ্মীসকলে।

ইপিনে, আজি শুকুৰবাৰে পুৱা কেন্দ্ৰটোলৈ আহি চুৰি হোৱা লেপটপটো ৰহস্যজনকভাৱে আগৰ স্থানতে প্ৰত্যক্ষ কৰাত ক্ষোভিত হৈ পৰে কৰ্মীসকল। ক্ষুব্ধ কৰ্মীসকলে আৰক্ষীয়ে তেওঁলোকক চোৰ জ্ঞান কৰি কৰা দুৰ্ব্যৱহাৰৰ প্ৰতিবাদত পুৱাৰে পৰা এন আৰ চি কেন্দ্ৰটোত নিজ নিজ কৰ্ম সম্পাদনৰ পৰা বিৰত থাকে। এনেদৰে কেন্দ্ৰটোত এন আৰ চি কাম-কাজ বন্ধ হৈ পৰাত কেন্দ্ৰটোলৈ বংশবৃক্ষ পুনৰীক্ষণৰ বাবে দূৰ-দূৰণিৰ পৰা অহা শ শ লোকৰ মাজত সৃষ্টি হয় হাহাকাৰ পৰিস্থিতিৰ।

এন আৰ চি কেন্দ্ৰটোত নিশা পহৰাৰ দায়িত্বত দুজনকৈ আৰক্ষী জোৱান আৰু উন্নয়ন খণ্ডটোৰ চকীদাৰজন থকাৰ পাছতো কিদৰে এই চুৰিকাণ্ড সংঘটিত হ’বলৈ পালে বুলি প্ৰশ্ন তুলি চোৰক অতিশীঘ্ৰে কৰায়ত্ত কৰাৰ দাবীৰে কেন্দ্ৰটোৰ চৌহদ উত্তাল কৰি তোলে কৰ্মীসকলে।পৰিস্থিতি অধিক উত্তপ্ত হৈ পৰাত পিছত বৰিবজাৰ আৰক্ষী ঘটনাস্থলীত উপস্থিত হৈ লেপটপটো জব্দ কৰাৰ লগতে তদন্ত আৰম্ভ কৰিছে।