বর্ণাঢ্য কাৰ্য্যসূচীৰে কলিয়াবৰত উদযাপিত হ’ল ৬৯ সংখ্যক গণৰাজ্য দিৱস
ৰাজ্যৰ বিভিন্ন প্ৰান্তত ৬৯ সংখ্যক গণৰাজ্য দিৱস উদযাপন কৰাৰ সমান্তৰালকৈ কলিয়াবৰ মহকুমা প্ৰশাসনৰ উদ্যোগতো কুঁৱৰীটোল গান্ধী খেল পথাৰত অতি আড়ম্বৰপূৰ্ণভাৱে গণৰাজ্য দিৱসটি উদযাপন কৰা হয়। বিভিন্ন কাৰ্য্যসূচীৰে আয়োজিত কলিয়াবৰৰ এই গণৰাজ্য দিৱসত পতাকা উত্তোলন কৰে কলিয়াবৰ মহকুমাৰ ভাৰপ্ৰাপ্ত মহকুমাধিপতি বিতোপন নেওগে।
পতাকা উত্তোলন কাৰ্য্যসূচীৰ পিছতে অনুষ্ঠিত হয় কুচ-কাৱাজ অনুষ্ঠান। এই কুচ-কাৱাজত কলিয়াবৰ মহকুমা আৰক্ষী, কলিয়াবৰ মহাবিদ্যালয় এন চি চি কে ধৰি বহুকেইখন শিক্ষা প্ৰতিষ্ঠানে যোগদান কৰে। জানিব পৰা মতে এই কুচ-কাৱাজত কলিয়াবৰ মহাবিদ্যালয়ৰ এন চি চি গোটে শ্ৰেষ্ঠ দলৰ সন্মান লাভ কৰাৰ লগতে কুঁৱৰীটোল উচ্চ মাধ্যমিক বিদ্যালয়ে দ্বিতীয় শ্ৰেষ্ঠ আৰু আমবাগান উচ্চতৰ মাধ্যমিক বিদ্যালয়ৰ এন চি চি গোটে তৃতীয় স্থান দখল কৰিবলৈ সক্ষম হয়।
এই কুচ-কাৱাজ অনুষ্ঠানৰ পিছতেই সাংস্কৃতিক কাৰ্য্যসূচী অনুষ্ঠিত হয়। এই সাংস্কৃতিক অনুষ্ঠানত কলিয়াবৰৰ শিল্পীসকলে দলীয়ভাৱে বিহু নৃত্য, সত্ৰীয়া নৃত্য আৰু দেশপ্ৰেমমূলক গীতৰ আধাৰত নৃত্য প্ৰদৰ্শন কৰে।এই অনুষ্ঠানৰ পিছতেই কণ-কণ শিশুসকলৰ মাজত খেল-ধেমালিৰ আয়োজন কৰে কলিয়াবৰ মহকুমা প্ৰশাসনে।
গণৰাজ্য দিৱসৰ অনুষ্ঠানৰ লগত সংগতি ৰাখি আবেলি কলিয়াবৰ মহকুমা প্ৰশাসন আৰু কলিয়াবৰ সাংবাদিক সন্থাৰ মাজত এখন প্ৰীতি ক্ৰিকেট খেল অনুষ্ঠিত হয়। এই খেলখনত কলিয়াবৰ মহকুমা প্ৰশাসনে ১১৬ ৰাণৰ লক্ষ্য নিৰ্ধাৰণ কৰি দিয়ে যদিও সাংবাদিক সন্থাই ৮০ ৰাণ সংগ্ৰহ কৰি পৰাজয়বৰণ কৰে।