বশিষ্ঠ আৰক্ষীৰ অভিযানত জব্দ দুই ট্ৰাক ফেন্সিডাইল: ঘটনাৰ সৈতে জড়িত দুজনক গ্ৰেপ্তাৰ

গুৱাহাটী মহানগৰীৰ বশিষ্ঠ আৰক্ষীয়ে বুধবাৰে এক অভিযান চলায় জব্দ কৰে দুই ট্ৰাক ফেন্সিডাইল । বিয়লি প্ৰায় ৩ মান বজাত এক গোপন সূত্ৰৰ পৰা লাভ কৰা তথ্য অনুসৰি বশিষ্ঠ চাৰিআলিৰ সমীপৰ ইণ্ডো আৰিয়া নামৰ গুদাম এটালৈ অনা অৱস্থাত এই বৃহৎ পৰিমাণৰ কাহৰ দৰবখিনি আৰক্ষীয়ে জব্দ কৰিবলৈ সক্ষম হয়। এই বৃহৎ পৰিমাণৰ নিষিদ্ধ কাহৰ দৰবখিনিৰ মূল্য প্ৰায় দুই কোটি টকা হ’ব বুলি আৰক্ষীয়ে জানিবলৈ দিয়ে।

আৰক্ষীয়ে জনোৱা অনুসৰি আহমেদাবাদৰ পৰা গুৱাহাটীলৈ দুখন ট্ৰাকেৰে অনা হৈছিল এই বৃহৎ পৰিমাণৰ ফেন্সিডাইল। ট্ৰাক দুখনত থকা মুঠ ৫৬৮ কাৰ্টন তথা ৪২,৭৮০ টা কডেক্স কফ চিৰাপ আৰক্ষীয়ে জব্দ কৰে।

আৰ জে-১৯ জি এ-৩০৫৩ আৰু আৰ জে-১৯ জি চি-৫১৪১ নম্বৰৰ ট্ৰাক দুখনেৰে কঢ়িওৱা হৈছিল এই নিষিদ্ধ কাহৰ দৰব। ঘটনা সন্দৰ্ভত ইতিমধ্যে বশিষ্ঠ আৰক্ষীয়ে চোৰাং ফেন্সিডাইল বেহাৰ সৈতে জড়িত থকা খৰ্গেশ্বৰ দাস (৪১) আৰু ৰাজস্থানৰ মহেন্দ্ৰ শৰ্মা নামৰ দুজন ব্যক্তিক গ্ৰেপ্তাৰ কৰিছে।

এক সূত্ৰৰ পৰা জানিব পৰা অনুসৰি আৰক্ষীয়ে জব্দ কৰা ফেন্সিডাইলখিনি মহানগৰীৰ লালগণেশ, কালাপাহাৰ, বৰাগাঁৱৰ বিভিন্ন স্থানলৈ প্ৰেৰণ কৰাৰ কথা আছিল। এই নিষিদ্ধ নিচাযুক্ত দৰবৰ ব্যৱসায়ৰ সৈতে জড়িত থকা চক্ৰটোৰ আন সদস্যসকলৰ সন্ধানত আৰক্ষীয়ে অভিযান অব্যাহত ৰখা বুলি জানিবলৈ দিয়ে।