বিদেশী মুক্ত নাগৰিকপঞ্জী : বিশ্বনাথৰ উপায়ুক্তক সাক্ষাৎ আছু আৰু বিশ্বনাথ জিলা কৰ্মচাৰীৰ

সদৌ অসম ছাত্ৰ সন্থাৰ আহ্বানত বিশ্বনাথ চাৰিআলি আঞ্চলিক ছাত্ৰ সন্থা আৰু বিশ্বনাথ জিলা কৰ্মচাৰীসকলৰ এটা যুটীয়া প্ৰতিনিধি দলে বৃহস্পতিবাৰে বিশ্বনাথ জিলাৰ উপায়ুক্তক সাক্ষাৎ কৰি  ৰাষ্ট্ৰীয় নাগৰিক পঞ্জী উন্নীতকৰণৰ বিষয়ে আলোচনা কৰে আৰু বিদেশী নামমুক্ত এখন শুদ্ধ নাগৰিকপঞ্জী প্ৰকাশ কৰাৰ লগতে যি সকল কৰ্মচাৰী এনআৰচিৰ কামত নিয়োজিত হৈ আছে তেওঁলোকৰ সাহস, মনোবল বৃদ্ধি কৰাৰ লগতে  নিৰাপত্তা যাতে সুনিশ্চিত হয় তাৰ বাবে আহ্বান জনায়।

এই ক্ষেত্ৰত জিলা উপায়ুক্তগৰাকীয়ে প্ৰতিনিধি দলটোক সকলো প্ৰকাৰে সহযোগিতা কৰাৰ আশ্বাস প্ৰদান কৰে।

উল্লেখযোগ্য যে ৰাজ্যৰ বিভিন্ন জিলাত আছু আৰু কৰ্মচাৰী পৰিষদে যৌথভাৱে উপায়ুক্তক সাক্ষাৎ কৰি নাগৰিকপঞ্জী উন্নীতকৰণৰ কামৰ বুজ লোৱাৰ লগতে এই কামত নিয়োজিত কৰ্মচাৰীসকলৰ নিৰাপত্তা নিশ্চিত কৰাৰ বাবে আহ্বান জনাইছে।

বিশ্বনাথ জিলাৰ উপায়ুক্তক সাক্ষাতৰ উক্ত কাৰ্যসুচীত উপস্থিত থাকে সদৌ অসম ছাত্ৰ সন্থাৰ সহকাৰী সাধাৰণ সম্পাদক দুলদুল বৰকটকী, বিশ্বনাথ জিলা কৰ্মচাৰী পৰিষদৰ উপদেষ্টা পবিত্ৰ শইকীয়া, সাধাৰণ সম্পাদক বিদ্যুত শৰ্মা, বিশ্বনাথ মহাবিদ্যালয়ৰ অধ্যক্ষ ড৹ মৃণাল বৰা, সদৌ শোণিতপুৰ জিলা ছাত্ৰ সন্থাৰ সহকাৰী সাধাৰণ সম্পাদক আজমত শ্বেখ, বিশ্বনাথ আঞ্চলিক ছাত্ৰ সন্থাৰ সাধাৰণ সম্পাদক ভাস্কৰ চমুৱাকে প্ৰমুখ্য কৰি আন কেইবাজনো বিষয়ববীয়া।