বিদ্যুতৰ স্থায়ী বিলৰ হাৰ বৃদ্ধি আৰু সঘনাই বিদ্যুৎ কৰ্তনৰ বিৰুদ্ধে নগাঁৱত কৃষক মুক্তিৰ প্ৰতিবাদত

নগাঁও জিলাত বিদ্যুতৰ বিলৰ হাৰ (ফিক্সড চাৰ্জ) বৃদ্ধি আৰু সঘনাই বিদ্যুৎ সেৱা কৰ্তনৰ বিৰুদ্ধে দেওবাৰে নগাঁও জিলাৰ কৃষক মুক্তি সংগ্রাম সমিতিৰ সদস্যসকল ৰাজপথলৈ ওলাই আহি প্ৰতিবাদ সাৱ্যস্ত কৰে।

নগাঁৱৰ কৃষ্ণাইঘাটৰ ৰাজপথত নগাঁও জিলাৰ কৃষক মুক্তি সংগ্রাম সমিতিৰ সদস্যসকলে শক্তি মন্ত্রী তপন কুমাৰ গগৈৰ পুত্তলিকা দাহ কৰাৰ লগতে হাতে হাতে প্লে’ কাৰ্ড লৈ চৰকাৰ বিৰোধী শ্ল’গানেৰে উত্তাল কৰি তোলে কৃষ্ণাইঘাটৰ ৰাজপথ।

উল্লেখ্য যে, ২৪ ঘন্টা বিদ্যুৎ সেৱা যোগান ধৰাৰ বিজেপি চৰকাৰৰ প্ৰতিশ্ৰুতি এতিয়া ফুটুকাৰ ফেনত পৰিণত হৈছে। কৃষক মুক্তি সংগ্রাম সমিতিয়ে বিদ্যুৎ যোগান নিয়মিত কৰা আৰু স্থায়ী বিলৰ হাৰ শীঘ্ৰে কমোৱাৰ বাবে চৰকাৰক দাবী জনায়।

সংগঠনটোৱে কৰ্তৃপক্ষই শীঘ্ৰেই এইক্ষেত্ৰত ব্যৱস্থা গ্ৰহণ নকৰিলে জংগী আন্দোলন গঢ়ি তোলাৰ হুংকাৰ প্ৰদান কৰে।

ৰাজ্যত বিদ্যুৎ সেৱাৰ মান এতিয়াও উন্নত নোহোৱাৰ সমান্তৰালকৈ নগাঁও জিলাতো বিদ্যুৎ যোগানৰ নামত ভেকোভাওনা চলি থকাৰ বাবে ৰাইজ অতিষ্ঠ হৈ পৰিছে। পৰ্যাপ্ত বিদ্যুৎ যোগান ধৰাত ব্যৰ্থ হোৱা বিভাগটোৱে বিদ্যুৎ বিলৰ হাৰ বৃদ্ধি কৰি ৰাইজৰ ৰোষত পৰিছে।