বিশিষ্ট বাঁহীবাদক প্ৰভাত শৰ্মা, চিকিৎসক ডাঃ অমল কটকী আৰু সাংবাদিক জাৰিৰ হুছেইনলৈ ‘ডি পি আৰ চি’ বঁটা

উত্তৰ-পূবৰ সৰ্ববৃহৎ ফিজিঅ’থেৰাপী প্ৰতিষ্ঠান ডি পি আৰ চিৰ ষষ্ঠ বৰ্ষপূতি আৰু বৰপেটা কেন্দ্ৰ উদ্বোধন উপলক্ষে আজি সন্ধিয়া বৰপেটা জিলা পুথিভৰাল প্ৰেক্ষাগৃহত এক গাম্ভীৰ্যপূৰ্ণ অনুষ্ঠান অনুষ্ঠিত হয়।

বৰপেটা সত্ৰৰ বুঢ়াসত্ৰীয়া বশিষ্ঠ শৰ্মা আৰু সংগীবৃন্দৰ নাম পৰিবশনেৰে আৰম্ভ হোৱা এই অনুষ্ঠানত কৃষি আৰু পশুপালন মন্ত্ৰী অতুল বৰা আৰু গড়কাপ্তানী আৰু শক্তি বিভাগৰ ৰাজ্যিক মন্ত্ৰী তপন গগৈয়ে ৰিম’টৰ বুটাম টিপি বৰপেটা কেন্দ্ৰৰ শুভাৰম্ভ কৰে।

আজিৰ এই বৰ্ষপুৰ্তি অনুষ্ঠানতে সংগীত নাটক অকাডেমী বঁটা প্ৰাপক, বিশিষ্ট বাঁহীবাদক প্ৰভাত শৰ্মাক ডি পি আৰ চি কলা সংস্কৃতি বঁটা প্ৰদান কৰে মন্ত্ৰী অতুল বৰাই।

ইয়াৰ উপৰি বি বৰুৱা কৰ্কট প্ৰতিষ্ঠানৰ সঞ্চালক ডাঃ অমল চন্দ্ৰ কটকীক ৰাজ্যিক মন্ত্ৰী তপন গগৈয়ে ডি পি আৰ চি চিকিৎসা সেৱা বঁটা আৰু নিউজ লাইভৰ এডিটৰ ইন চীফ জাৰিৰ হুছেইনক বৰপেটাৰ বিধায়ক গুণীন্দ্ৰ নাথ দাসে ডি পি আৰ চি সাংবাদিকতাৰ বঁটা প্ৰদান কৰে।

তদুপৰি এই অনুষ্ঠানতে সংগীত নাটক অকাডেমী বঁটা প্ৰাপক জগন্নাথ বায়নক বিশেষভাবে সম্বৰ্ধণা জনোৱা হয়।

বৰ্ষপূতি অনুষ্ঠানত জিলা উপায়ুক্ত থানেশ্বৰ মালাকাৰ, বিশিষ্ট চিকিৎসক নবনীল বৰুৱা, ডি পি আৰ চিৰ পৰিচালন সঞ্চালক দিগন্ত দাসৰ লগতে কেবাগৰাকী বিশিষ্ট ব্যক্তি আৰু বহু সংখ্যক ৰাইজ উপস্থিত থাকে ৷