নাগৰিকত্ব সংশোধনী বিধেয়কৰ বিৰুদ্ধে বিশ্বনাথত আছুৰ বিশাল জোঁৰ সমদল

বিজেপি নেতৃত্বাধীন কেন্দ্ৰীয় চৰকাৰে অসমৰ জনসাধাৰণৰ ওপৰত নাগৰিকত্ব সংশোধনী বিধেয়কৰ জৰিয়তে অবৈধ বিদেশীৰ বোজা জাপি দিব খোজা সিদ্ধান্তৰ বিৰুদ্ধে ৰাজ্যৰ বিভিন্ন প্ৰান্তত অব্যাহত থকা প্ৰতিবাদৰ জোৱাৰ অলপো শাম কটা নাই, বৰঞ্চ ই আৰু অধিক তীব্ৰতৰ ৰূপ লোৱা দেখিবলৈ পোৱা গৈছে।

ইয়াৰে অংশ হিচাপে ৰাজ্যৰ আন আন ঠাইৰ লগতে বিশ্বনাথ চাৰিআলিৰ ৰাজপথত আজি সদৌ অসম ছাত্ৰ সন্থাৰ উদ্যোগত এক বিশাল প্ৰতিবাদী জোঁৰ সমদল বাহিৰ কৰা হয়।

অসমৰ খিলঞ্জীয়াৰ অস্তিত্ব বিপদাপন্ন হ’ব পৰা চৰকাৰৰ এই জাতিধ্বংসী কাৰ্যৰ প্ৰতিবাদত উলিওৱা উক্ত প্ৰতিবাদী সমদলত প্ৰায় ৫ শতাধিক প্ৰতিবাদকাৰীয়ে ৰাজ্য চৰকাৰক তীব্ৰ হুংকাৰ জনোৱাৰ লগতে নৰেন্দ্ৰ মোদী হুঁচিয়াৰ, সৰ্বানন্দ সোনোৱাল হুঁচিয়াৰ আদি শ্লোগানেৰে বিশ্বনাথ চাৰিআলিৰ ৰাজপথ কঁপাই তোলে।

সদৌ অসম ছাত্ৰ সন্থাৰ বিশ্বনাথ চাৰিআলি আঞ্চলিক সমিতিৰ উদ্যোগত উলিওৱা এই জোঁৰ সমদলৰ প্ৰতি বিশ্বনাথৰ কেইবাটাও জাতীয় দল-সংগঠন, মহিলা সংগঠন, ই ৰিক্সা চালককে আদি কৰি প্ৰায় সকলো সচেতন নাগৰিকৰ সহযোগিতা আগবঢ়ায়।