বিশ্বনাথ ঘাটৰ পৰা কাজিৰঙা উত্তৰ সংমণ্ডলে আটক কৰিলে দুৰ্ধৰ্ষ চোৰাংচিকাৰীক

কাজিৰঙা ৰাষ্ট্ৰীয় উদ্যানৰ পৰা চোৰাংচিকাৰীয়ে গঁড় নিধন কৰি কাটি নিয়া খড়গ সমূহ ডিমাপুৰ আৰু নাগালেণ্ডত চোৰাংভাৱে ১ কি. গ্ৰা.ত ১ কোটি টকা দামত বিক্ৰী কৰা হয়। এই কথা সদৰী কৰে আজি কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ উত্তৰ সংমণ্ডলে আটক কৰা এজন চোৰাংচিকাৰীয়ে।

প্ৰাপ্ত তথ্য মতে আজি পুৱা কাজিৰঙা ষষ্ঠ সংযোজনৰ উত্তৰ সংমণ্ডলে বিশ্বনাথ চাৰিআলি আৰক্ষী চকীৰ অধীনৰ বিশ্বনাথ ঘাটৰ নিজ বিশ্বনাথৰ পৰা জাবিদুৰ ৰহমান ওৰফে ভূজেল নামৰ এজন চোৰাংচিকাৰীক আটক কৰে।

জানিব পৰা মতে উত্তৰ-পূবত বন্য প্ৰাণীৰ অংগ-প্ৰত্যংগৰ এখন অবৈধ আন্তঃৰাষ্ট্ৰীয় পৰ্যায়ৰ বজাৰ গঢ়ি উঠিছে য’ত অসমৰ পৰা বন্যপ্ৰাণীৰ অংগ-প্ৰত্যংগ সমূহ চোৰাংভাৱে নিয়া হয়। এই বন্যপ্ৰাণীৰ অংগ-প্ৰত্যংগ সমূহ চোৰাংভাৱে কেতিয়াবা অৰুণাচল আৰু কেতিয়াবা ডিমাপুৰত বিক্ৰী কৰা হয়।

আজি পুৱা কাজিৰঙা উত্তৰ সংমণ্ডলৰ বন বিষয়া আৰু বিশ্বনাথ আৰক্ষী চকীৰ আৰক্ষীৰ যৌথ অভিযানত ব্ৰহ্মপুত্ৰৰ নদীৰ কাষৰ বিশ্বনাথ ঘাটত থকা নিজ বাসগৃহৰ পৰা জাবিদুৰ ৰহমানক আটক কৰিবলৈ সক্ষম হয়। আটকাধীন ৰহমান কাজিৰঙা ৰাষ্ট্ৰীয় উদ্যানৰ তিনিটাকৈ গঁড় চিকাৰত জড়িত থকাৰ লগতে উত্তৰ সংমণ্ডত ২০১৬ চনত ৰুজু হোৱা এটা অস্ত্ৰ-শস্ত্ৰ গোচৰটো ৰহমানৰ নাম জড়িত আছে।

কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ উত্তৰ সংমণ্ডলৰ বিষয়া প্ৰাঞ্জল বৰুৱাই জনোৱা মতে ধৃত ৰহমান বাগৰিৰ এটা গঁড় চিকাৰৰ লগত জড়িত আছিল আৰু বাকী কেইটা গঁড় চিকাৰৰ বিষয়ে ৰহমানক সোধ-পোছৰ অন্ততহে জানিব পৰা হ’ব আৰু লগতে তেওঁ কয় যে ৰহমানে নিজৰ নাম সলনি কৰি বিভিন্ন ঠাইত আত্মগোপন কৰি আছিল।

বৰুৱাই কয় যে ৰহমানক চলোৱা জেৰাত অলপতে ৰহমানে ডিমাপুৰত এটা গঁড়ৰ খড়গ বিক্ৰী কৰি ৫০ লাখ টকা লাভ কৰা বুলি স্বীকাৰোক্তি দিয়ে। আনহাতে ৰাষ্ট্ৰীয় উদ্যানখনত চোৰাংচিকাৰীৰ সক্ৰিয়তাৰ বৃদ্ধি পোৱাৰ কথা উল্লেখ কৰি বৰুৱাই কয় যে বন্যপ্ৰাণী সমূহ বিভিন্ন অঞ্চলত বিয়পি পৰাৰ ফলত চোৰাংচিকাৰীৰ বাবে চিকাৰ কৰাত সুবিধা হয়।

বৰুৱাই সংযোজনটোত বন বিভাগৰ চোৰাংচিকাৰীক ৰোধ কৰাত সহায় হোৱাকৈ বিভিন্ন ধৰণৰ পদক্ষেপ হাতত লোৱা হৈছে। তাৰোপৰি ধৃত চোৰাংচিকাৰীটোক অধিক তথ্য উদ্ধাৰৰ বাবে সোধ-পোছ অব্যাহত ৰখা হৈছে বুলিও বৰুৱাই জানিবলৈ দিয়ে।