‘বেটী বচাও, বেটী পঢ়াও’ আঁচনিৰ শ্ৰেষ্ঠ ১০ ৰাজ্যৰ ভিতৰত স্থান লাভ ছিকিমৰ
প্ৰধানমন্ত্ৰী নৰেন্দ্ৰ মোডীৰ অভিলাসী আঁচনি ‘বেটী বচাও, বেটী পঢ়াও’ত কন্যা শিশুৰ অধিকাৰৰ বাবে আগবঢ়োৱা উল্লেখযোগ্য বৰঙণিৰ বাবে দেশৰ শ্ৰেষ্ঠ ১০ ৰাজ্যৰ ভিতৰত স্থান লাভ কৰিবলৈ সক্ষম হৈছে ছিকিমৰ নৰ্থ জিলাই।
যোৱা বৃহস্পতিবাৰে ৰাজস্থানৰ ঝুনঝুনত অনুষ্ঠিত এক গাম্ভীৰ্যপূৰ্ণ অনুষ্ঠানত অন্যান্য ৰাজ্যৰ সৈতে ছিকিমৰ নৰ্থ জিলাক এই বঁটা প্ৰদান কৰে প্ৰধানমন্ত্ৰী নৰেন্দ্ৰ মোডীয়ে।
ছিকিম চৰকাৰৰ এক প্ৰেছ বিবৃতিত প্ৰকাশ পোৱা অনুসৰি নৰ্থ জিলাৰ হৈ প্ৰধানমন্ত্ৰী নৰেন্দ্ৰ মোডীৰ পৰা বঁটাটো গ্ৰহণ কৰে জিলাখনৰ কালেক্টৰ কৰ্মা আৰ বনপোৱে।
উল্লেখ্য যে ‘বেটী বচাও, বেটী পঢ়াও’ আঁচনিত ছিকিমৰ সৈতে স্থান লাভ কৰা অন্যান্য ৰাজ্যকেইখন হৈছে ক্ৰমে ৰায়গড় ( চত্তীশগড় ), বিজাপুৰ ( কৰ্নাটক ), টৰন টৰন ( পঞ্জাৱ ), হায়দৰাবাদ ( তেলেংগানা ), শোণিপট (হাৰিয়ানা), আহমেদাবাদ (গুজৰাট ), ঝুনঝুনু ( ৰাজস্থান ) আৰু উধমপুৰ ( জম্মু কাশ্মীৰ)।
স্মৰ্তব্য যে ছিকিমৰ নৰ্থ জিলাত বিগত প্ৰায় তিনি বছৰ ধৰি ‘বেটী বচাও, বেটী পঢ়াও’ আঁচনি চলি আছে।
সমগ্ৰ দেশৰ ১০ খন শ্ৰেষ্ঠ ৰাজ্যৰ ভিতৰত স্থান লাভ কৰি ছিকিমে উত্তৰ পূৰ্বাঞ্চললৈ গৌৰৱ কঢ়িয়াই আনিবলৈ সক্ষম হৈছে ।এইক্ষেত্ৰত মুখ্যমন্ত্ৰী পৱন কুমাৰ চামলিঙৰ ভূমিকাৰ শলাগ লৈছে ৰাইজে।