বোকাখাতত সংঘটিত ধৰ্ষণ আৰু হত্যাৰ অপৰাধীক গ্ৰেপ্তাৰৰ দাবীত আছুৰ দুঘণ্টীয়া অৱস্থান ধৰ্মঘট

শেহতীয়াকৈ বোকাখাতত সংঘটিত তিনিটাকৈ নাৰকীয় নাৰী নিৰ্যাতন আৰু হত্যাকাণ্ডক লৈ বোকাখাত আঞ্চলিক ছাত্ৰ সন্থাই আজি দুঘন্টীয়া অৱস্থান ধৰ্মঘট কাৰ্যসূচী ৰূপায়ণ কৰে ৷

উল্লেখযোগ্য যে বোকাখাত মহকুমা আৰক্ষী বিষয়াৰ কাৰ্যালয়ৰ চৌহদত নৈশ চকিদাৰ নিপেন কলিতাৰ পত্নীৰ ৰহস্যজনক আত্মহত্যাৰ পাচত দোষী গৃহৰক্ষী জোৱান মিন্টু কুমাৰ নাথক আৰক্ষীয়ে গ্ৰেপ্তাৰ কৰি জেল হাজোতলৈ প্ৰেৰণ কৰাৰ বিপৰীতে বনকৰা যুৱতী মুনু ডেকাই তীৰ্থ শৰ্মা নামৰ যুৱকজনৰ যৌন আতিশয্যৰ বলি হৈ মৃত্যু বৰণ কৰাৰ পাছত বোকাখাত আৰক্ষীয়ে তীৰ্থ শৰ্মাকো গ্ৰেপ্তাৰ কৰি জেল হাজোতলৈ প্ৰেৰণ কৰিছিল ৷

কিন্তু ইয়াৰ বিপৰীতে যোৱা ৬ জুনত বোকাখাতৰ আনন্দপুৰ চাহ বাগিচাত মাইটি পেগু নামৰ মহিলাগৰাকীক দুৰ্বৃত্তই ধৰ্ষণ কৰি ডিঙি কাটি হত্যা কৰি পেলাই থৈ যোৱা আজি তেৰ দিন অতিক্ৰম কৰিলে যদিও বোকাখাত আৰক্ষীয়ে হত্যাকাৰীক কৰায়ত্ত কৰিব নোৱাৰা কাৰ্যত উদ্বেগ প্ৰকাশ কৰিছে আছুৰ কৰ্মকৰ্তাই ৷

ফলত আজি বোকাখাত আঞ্চলিক ছাত্ৰ সন্থাই দুঘণ্টীয়া অৱস্থান ধৰ্মঘটৰ জৰিয়তে বোকাখাতৰ ধাৰাবাহিক নাৰী নিৰ্যাতনৰ ঘটনা প্ৰতিৰোধ কৰাৰ লগতে দোষীক উপযুক্ত শাস্তিৰ দাবীত বোকাখাতৰ মহকুমাধিপতিৰ জৰিয়তে মুখ্যমন্ত্ৰীলৈ এখন স্মাৰকপত্ৰ প্ৰেৰণ কৰে।