বোকাখাতৰ বান বিধ্বস্ত অঞ্চল পৰিদৰ্শন কেবিনেট মন্ত্ৰী অতুল বৰাৰ

কাৰ্বি আংলং পাহাৰৰ পৰা নামি অহা ডিফলু নদীৰ ধলে বুধবাৰে বোকাখাত আৰু ইয়াৰ বিস্তীৰ্ণ অঞ্চল প্লাৱিত কৰাৰ পাছত আজি পৰিস্থিতি কিছু পৰিমানে নিয়ন্ত্ৰিত হোৱা পৰিলক্ষিত হৈছে। বান পৰিস্থিতি কিছু পৰিমাণে স্বাভাৱিক হৈছে যদিও অঞ্চলটোৰ সামগ্ৰিক পৰিস্থিতিৰ বুজ লোৱাৰ উদ্দেশ্যে আজি বানাক্ৰান্ত অঞ্চলসমূহত উপস্থিত হয় বোকাখাতৰ বিধায়ক তথা কেবিনেট মন্ত্ৰী অতুল বৰা।

মন্ত্ৰী গৰাকীয়ে বোকাখাত নগৰৰ বান বিধস্ত ৱাৰ্ড বোৰৰ  লগতে,  মিলনপুৰ, কলাখোৱা আদি বান বিধস্ত অঞ্চল পৰিভ্ৰমন কৰি স্থানীয় লোকৰ সমস্যাৰ বুজ লয়৷ ইফালে বোকাখাতৰ চাৰি নম্বৰ বাৰ্ডৰ বান বিধস্ত এলেকা পৰিভ্ৰমনৰ সময়ত অঞ্চলটোৰ বাসিন্দাই মন্ত্ৰী গৰাকীৰ কাম-কাজত অসন্তুষ্ট হৈ তেওঁৰ ওচৰত ক্ষোভ উজাৰে৷ বান বিধস্ত অঞ্চলবোৰত তৎকালিন ভাৱে বান সাহায্য দিবৰ বাবে মন্ত্ৰী অতুল বৰাই বোকাখাতৰ মহকুমা প্ৰশাসনক নিৰ্দেশ দিয়ে৷

বানাক্ৰান্ত অঞ্চল ভ্ৰমন কৰি বৰ্নাত্য লোকৰ সৈতে আলোচনা কৰি  বান পৰিস্থিতি সম্পৰ্কত স্থানীয় প্ৰশাসনৰ সৈতেও আলোচনাত মিলিত হয়  মন্ত্ৰী অতুল বৰা৷ বোকাখাত মহকুমাধিপতিৰ কাৰ্যালয়ৰ সভাগৃহত আয়োজিত এই বৈঠকত বোকাখাতৰ মহকুমাধিপতিৰ উপৰি মহকুমাটোৰ বিভিন্ন বিভাগৰ বিষয়াসকল উপস্থিত থাকে৷

আলোচনাত মন্ত্ৰী অতুল বৰাই শেষতীয়া ধলত ধ্বংস হোৱা বাট পথ মেৰামতিৰ বাবে তাৎক্ষণিক ভাৱে এষ্টিমেট প্ৰস্তুত কৰি কাম কৰিবলৈ সংশ্লিষ্ট বিভাগক মন্ত্ৰী গৰাকীয়ে নিৰ্দেশ দিয়ে৷ বিদ্যুত আৰু স্বাস্থ্য বিভাগক সক্ৰিয়তাৰে কাম কৰাৰ লগতে বানাক্ৰান্ত অঞ্চললৈ গৈ সকলো কাৰ্য পৰিচালনা কৰিবলৈ আহ্বান জনায়৷ বান সাহাৰ্য আৰু পশুধন সমূহৰ যাতে খাদ্য প্ৰকৃত হিতাধিকাৰীয়েহে পাই তাৰ প্ৰতি চকু ৰাখিবৰ বাবে মহকুমা প্ৰশাসনকো নিৰ্দেশ দিয়ে অতুল বৰাই।