বোকাখাতৰ শিলভেটা গাঁৱত দুজন সন্দেহযুক্ত আনলা সদস্য আটক

বোকাখাত শিলভেটা গাঁৱত সংগোপনে আশ্ৰয় লৈ থকা দুজন সন্দেহযুক্ত আদিবাসী উগ্ৰপন্থী সংগঠন আনলাৰ সদস্যক মঙ্গলবাৰে গাওঁবাসীয়ে আটক কৰি বোকাখাত আৰক্ষীক চমজাই দিয়ে ৷

সন্দেহযুক্ত উগ্ৰপন্থী সদস্য দুজনক বোকাখাত কলাখোৱাৰ অনন্ত তাঁতী আৰু তেজপুৰ বান্দৰমাৰী অঞ্চলৰ প্ৰানজিৎ ভক্ত বুলি আৰক্ষীয়ে চিনাক্ত কৰিছে ৷

সন্দেহযুক্ত উগ্ৰপন্থী দুজনে দীৰ্ঘ দিন ধৰি শিলভেটা গাওঁলৈ আহি গাওঁবাসীক বন্দুক দেখুৱাই ভীতিগ্ৰস্ত কৰি আহিছিল আৰু গাওঁবাসীয়ে এই সম্পৰ্কত বোকাখাত আৰক্ষীক খবৰো দিছিল ৷

আৰক্ষীয়ে পূৰ্বতে অভিযান চলাই এই সদস্য দুজনে ব্যৱহাৰ কৰা এখন মটৰ চাইকেল জব্দও কৰিছিল।

মঙলবাৰে নিশা পুনৰ গাওঁলৈ সন্দেহযুক্ত এই সদস্য দুজন অহাৰ সময়ত গাওঁবাসীয়ে কৌশলেৰে কৰায়ত্ব কৰি উত্তম মাধ্যম দি বোকাখাত আৰক্ষীক চমজাই দিয়ে।

ৰাইজৰ প্ৰহাৰত গুৰুতৰভাৱে আহত হোৱা সন্দেহযুক্ত আনলা উগ্ৰপন্থী দুজনক বোকাখাতত প্ৰাথমিক চিকিৎসা প্ৰদান কৰি বোকাখাত আৰক্ষীয়ে যোৰহাট চিকিৎসা মহাবিদ্যালয়লৈ প্ৰেৰণ কৰে  ৷