ব্যতিক্ৰমী ৰূপত আয়োজিত হ’ব কামাখ্যাত অম্বুবাচীৰ উদ্বোধনী অনুষ্ঠান
অহা ২২ জুনৰ পৰা কামাখ্যাত আৰম্ভ হ’ব অম্বুবাচী মেলা। মেলাৰ বাবে এতিয়া কামাখ্যা ধামত ব্যাপক প্ৰস্তুতি চলিছে। শক্তিপীঠ কামাখ্যাৰ মন্দিৰৰ চৌহদত এতিয়া এক ব্যস্ততাপূৰ্ণ পৰিৱেশে বিৰাজ কৰিছে।
শুকুৰবাৰে কামাখ্যাত উপস্থিত হৈ পৰ্যটন মন্ত্ৰী চন্দন ব্ৰহ্ম, কামৰূপ মহানগৰ জিলাৰ উপায়ুক্ত বীৰেন্দ্ৰ মিট্টাল আৰু অসম পৰ্যটন নিগমৰ অধ্যক্ষ জয়ন্তমল্ল বৰুৱাই অম্বুবাচী মেলাৰ প্ৰস্তুতিৰ বুজ লয়।
জানিব পৰা মতে এইবাৰ ব্যতিক্ৰমী ৰূপত অম্বুবাচী মেলাৰ উদ্বোধনী অনুষ্ঠানৰ আয়োজন কৰা হ’ব। তদুপৰি ভক্তসকলৰ থকা-খোৱাৰ ব্যৱস্থা পূৰ্বতকৈ বৃদ্ধি কৰা হৈছে।
আনহাতে, জ্যেষ্ঠ নাগৰিক আৰু বিশেষভাৱে সক্ষম লোকৰ বাবে থাকিব বিশেষ সুবিধা। অম্বুবাচী মেলাৰ প্ৰচাৰৰ ক্ষেত্ৰতো বিশেষ ব্যৱস্থা লোৱা হৈছে। ৰাষ্ট্ৰীয় আৰু আন্তঃৰাষ্ট্ৰীয় চেনেলত বিজ্ঞাপন প্ৰচাৰ কৰাৰ লগতে মুম্বাই, দিল্লী আৰু কলকাতা বিমান বন্দৰতো বিজ্ঞাপনৰ ব্যৱস্থা কৰা হৈছে।
উল্লেখযোগ্য যে অম্বুবাচী মেলাক আন্তৰ্জাতিক পৰ্যায়ৰ মেলালৈ উত্তৰণ কৰাৰ পাছৰে পৰা অধিক দেশী-বিদেশী ভক্তৰ সমাগম ঘটিছে। এইবাৰো যথেষ্ট সংখ্যক ভক্তৰ সমাগম আশা কৰা হৈছে। ভক্ত আৰু দৰ্শনাৰ্থীৰ বাবে শৌচাগাৰ, প্ৰসাৱগাৰ আৰু পানী টেপৰ পৰ্যাপ্ত ব্যৱস্থা কৰা হ’ব।
আনহাতে, ভক্তসকলৰ নিৰাপত্তা, যাতায়াত, চিকিৎসা আদিৰ ক্ষেত্ৰতো ব্যৱস্থা গ্ৰহণ কৰা হ’ব। মেলাস্থলীত আৰক্ষী বাহিনীৰ উপৰি যথেষ্ট সংখ্যক স্বেচ্ছাসেৱক নিয়োগ কৰা হ’ব বুলিও উদ্যোক্তাসকলে জানিবলৈ দিছে।