ব্রহ্মপুত্রত অস্বাভাৱিক হাৰত মাছৰ উৎপাদন হ্ৰাস : ভোগালীৰ বজাৰত থলুৱা মাছৰ নাটনিৰ সম্ভাৱনা
সমাগত ভোগালীৰ উৰুকাৰ বজাৰত ৰাজ্যখনত থলুৱা প্ৰজাতিৰ মাছৰ ব্যাপক নাটনিৰ সম্ভাৱনাই দেখা দিছে। অসম আৰু অসমীয়াৰ আয়ুস ৰেখা ব্ৰহ্মপুত্ৰই পুনৰ এক অশনি সংকেত বহন কৰিছে।
বৰলুইতৰ পানীত এন টি ইউৰ পৰিমাণ অত্যথিক মাত্ৰাত বৃদ্ধি হৈ ইয়াৰ পানী অস্বাভাৱিকভাৱে ঘোলা হৈ পৰাৰ প্ৰসংগই ৰাষ্ট্ৰীয় আৰু আন্ত:ৰাষ্ট্ৰীয় পৰ্যায়তো ব্যাপক চৰ্চা লাভ কৰাৰ সময়তে নদীখনৰ বুকুৰ পৰা বিভিন্ন প্ৰজাতিৰ থলুৱা মাছ অপ্ৰত্যাশিত হাৰত হ্ৰাস পোৱাৰ ঘটনা পোহৰলৈ আহিছে। এনে এক পৰিস্থিতিত অসমীয়াৰ হেঁপাহৰ ভোগালী বজাৰত ব্ৰহ্মপুত্ৰৰ থলুৱা মাছৰ নাটনিৰ পূৰ্ণ সম্ভাৱনা দেখা দিছে।
দৰং জিলাৰ কুৰুৱা ঢলপুৰৰ পৰা মঙলদৈৰ চেৰেং হৈ খাৰুপেটীয়াৰ আৰিমাৰি আৰু ওৰাং ৰাষ্ট্ৰীয় উদ্যানৰ সীমামূৰীয়া প্ৰায় ৪০ কিলোমিটাৰ দৈৰ্ঘৰ ব্ৰহ্মপুত্ৰৰ বিশাল জলৰাশিত শেহতীয়াকৈ এনে অস্বাভাৱিক পৰিৱৰ্নৰ তথ্য পোহৰলৈ আহিছে। যুগ যুগ ধৰি ব্ৰহ্মপুত্ৰ আৰু ব্ৰহ্মপুত্ৰৰ সুঁতিত মাছ মাৰি বা মাছৰ মহল চলাই জীৱন নিৰ্বাহ কৰি অহা এই অঞ্চলৰ মৎস্যজীৱী লোকৰ পৰা এই কথাৰ সম্ভেদ পোৱা গৈছে।
আৰিমাৰি ঘাটৰ এগৰাকী অভিজ্ঞ মৎস্যজীৱী ব্যক্তি মহম্মদ আলীয়ে কোৱা মতে যিখন নদীত ইমান দিনে মাছ মাৰি দৈনিক ১৮-২০ কিলো মাছ পাইছিল আৰু সুন্দৰকৈ পৰিয়াল পোহপাল দিছিল, সেই একে স্থানতে মাছ মাৰি এতিয়া তেওঁলোকে মাত্ৰ ২-৩ কিলো মাছহে পাবলৈ সক্ষম হৈছে।
তেওঁ জনোৱা মতে অঞ্চলটোত মাছৰ উৎপাদন হঠাতে এনেদৰে হ্ৰাস পাইছে যে মহলৰ পৰা লাভ পোৱা দূৰৰে কথা চৰকাৰী ৰাজহৰ ধনো নিজৰ জেপৰ পৰাহে দিব লাগিব। বিগত প্ৰায় এমাহে অব্যাহত থকা এই পৰিস্থিতি আগন্তুক আৰু কিছু দিনলৈ এইদৰে অব্যাহত থাকিলে এই বৃহত্তৰ অঞ্চলটোৰ ৬ টা মীন মহলৰ পৰা ৰাজ্যৰ বিভিন্ন বজাৰলৈ যোগান ধৰা দৈনিক শ শ কুইণ্টল থলুৱা মাছৰ বাবে গ্ৰাহকে আৰু ভিৰ কৰাৰ সুবিধা নাপাব। ইয়াৰ লগে লগে কেইবা হেজাৰ নৈপৰীয়া পৰিয়ালে বংশানুক্ৰমে কৰি অহা মাছৰ ব্যৱসায় ত্যাগ কৰি অইন ব্যৱসায়ৰ সন্ধান কৰিব লাগিব।