বৰপেটাত চূড়ান্ত খচৰাত পঞ্চায়তত শুনানি লোৱা ৯০শতাংশৰ নাম অন্তৰ্ভুক্ত নোহোৱাৰ অভিযোগ

দীর্ঘদিনীয়া আশা-আকাংক্ষাৰ অন্তত সোমবাৰে প্ৰকাশ পালে এন আৰ চিৰ চূড়ান্ত খচৰা। পাইলট প্ৰজেক্টৰ কামত বৰপেটা জিলাত হিংসাত্মক ঘটনা সংঘটিত হোৱাৰ বাবে এন আৰ চিৰ কাম কাজত ৰাজ্যবাসীৰ দৃষ্টি নিবদ্ধ আছিল বৰপেটা জিলাৰ ওপৰত।

চূড়ান্ত খচৰা প্ৰকাশৰ পিছত জিলাখনত অপ্ৰীতিকৰ পৰিস্থিতিৰ সৃষ্টি হ’ব পাৰে বুলি আশংকা কৰি জিলা প্ৰশাসন আৰু আৰক্ষী প্ৰশাসন সষ্টম হৈ আছিল ৷ কিন্তু চূড়ান্ত খচৰা প্ৰকাশৰ পিছত  জিলাখনৰ কোনো প্ৰান্তত অপ্ৰীতিকৰ পৰিস্থিতিৰ সৃষ্টি হোৱা নাই ৷ কবলৈ গ’লে  জিলাখনত শান্তিপূৰ্ণভাবে প্ৰকাশ হয় এন আৰ চি ৰ চূড়ান্ত খচৰা ৷

আনহাতে, এন আৰ চি ৰ চূড়ান্ত খচৰাক লৈ প্ৰতিক্ৰিয়া প্ৰকাশ কৰিছে অসম সংখ্যালঘু সংগ্ৰাম পৰিষদে ৷ সংবাদ মাধ্যমৰ জৰিয়তে পৰিষদৰ কেন্দ্ৰীয় সমিতিৰ সাধাৰণ সম্পাদক মোৱাজ্জেম হুছেইনে জনায় যে, পঞ্চায়তত শুনানি লোৱা প্ৰায়  ৯০ শতাংশ লোকৰ নাম চূড়ান্ত খচৰাত অন্তৰ্ভূক্ত নহ’ল ৷

বৈধ নথি থকা প্ৰায় সকলোৰে  নাম এন আৰ চিত প্ৰকাশ পাইছে যদিও  কিছুমান বিষয়াৰ গা এৰা দিয়া কামৰ বাবে বহুত বৈধ নাগৰিকৰ নাম চূড়ান্ত খচৰাৰ পৰা বাদ পৰি ৰ’ল বুলি পৰিষদে উল্লেখ কৰে ৷ যিসকল লোকৰ  নিজ নিজ পঞ্চায়তত শুনানি গ্ৰহণ কৰা হৈছিল সেইসকলৰ প্ৰায় ৯০ শতাংশৰ নাম এন আৰ চি ৰ চূড়ান্ত খচৰাত অন্তৰ্ভূক্ত নহ’ল বুলি পৰিষদে জানিবলৈ দিয়ে ৷

এন আৰ চি কৰ্তৃপক্ষৰ একাংশৰ কৰ্তব্যত গা এৰা দিয়া মনোভাৱৰ বাবেই সেইসকল লোকৰ নাম বাদ পৰিল বুলি পৰিষদে অভিযোগ কৰে ৷ নিজ নিজ পঞ্চায়তত হোৱা শুনানিৰ ক্ষেত্ৰত আৰু জাননী প্ৰেৰণ কৰাৰ ক্ষেত্ৰত এন আৰ চি  কৰ্তৃপক্ষ আৰু ভি এল অ’ৰ গাফিলতিৰ কাৰণেই সোমবাৰে প্ৰকাশ পোৱা এন আৰ চি ৰ চূড়ান্ত খচৰাৰ পৰা লাখ লাখ বৈধ নাগৰিকৰ নাম বাদ পৰা বুলি অভিযোগ কৰে সংখ্যালঘু সংগ্ৰাম পৰিষদে ৷

পৰিষদে সকলো বৈধ ভাৰতীয়ৰ নাম পৰবৰ্তী সময়ত অন্তৰ্ভুক্ত হ’ব বুলি আশা ব্যক্ত কৰি চূড়ান্ত খচৰাত অন্তৰ্ভূক্ত নোহোৱা বৈধ লোক সকলৰ  চিন্তাৰ কোনো কাৰণ নাই বুলিও সদৰী কৰে ৷