বৰপেটা-বাক্সা জিলাৰ ৫৭ গৰাকী মেধাৱী ছাত্ৰীক স্কুটি বিতৰণ
হাইস্কুল শিক্ষান্ত পৰীক্ষাত বৰপেটা আৰু বাক্সা জিলাৰ পৰা বিগত বৰ্ষত সুখ্যাতিৰে উত্তীৰ্ণ হোৱা ৫৭ গৰাকী ছাত্ৰীক শিক্ষা বিভাগে কালি আনুষ্ঠানিকভাৱে স্কুটি বিতৰণ কৰে। জিলাখনৰ শিমলাগুৰিত থকা মেঘনা হিৰ’ ডিলাৰত এই উপলক্ষে এক অনুষ্ঠানৰ আয়োজন কৰা হয়।
বৰপেটা জিলা পৰিবহণ বিষয়া গৌতম দাসে হাইস্কুল শিক্ষান্ত পৰীক্ষাত ৰাজ্যখনৰ ভিতৰতে সুখ্যাতিৰে উত্তীৰ্ণ হোৱা সৰ্থেবাৰী নসত্ৰৰ কৃষ্ণগুৰু মহাবিদ্যালয়ৰ মেধাৱী ছাত্ৰী অলকা দাসক প্ৰথমখন স্কুটি প্ৰদান কৰি অনুষ্ঠানটোৰ শুভাৰম্ভ কৰে।
অনুষ্ঠানটো শুভাৰম্ভ কৰি দিয়া ভাষণত জিলা পৰিবহণ বিষয়াগৰাকীয়ে মেধাৱী ছাত্ৰীসকলক যান-বাহন আইন সম্পৰ্কত অৱগত কৰাৰ উপৰি বিভিন্ন ধৰণৰ পৰামৰ্শ আগবঢ়ায়। দুচকীয়া বাহন চলোৱাৰ সময়ত হেলমেট ব্যৱহাৰ কৰা, যান-বাহন আইন মানি চলা আদি বিষয়সমূহৰ ওপৰত গুৰুত্ব দিবলৈ ছাত্ৰীসকলক আহ্বান জনায় জিলা পৰিবহন বিষয়াগৰাকীয়ে।
এই অনুষ্ঠানত বৰপেটা জিলা পৰিবহণ বিভাগৰ সহকাৰী প্ৰৱৰ্তক পৰিদৰ্শক বিশ্বেশ্বৰ ৰয়, চিকিৎসক ৰমেন নাথ আৰু বাউসী বাণীকান্ত কাকতি মহাবিদ্যালয়ৰ অৱসৰপ্ৰাপ্ত অধ্যাপক ঘনশ্যাম দাসো উপস্থিত থাকি ছাত্ৰীসকলক অধ্যয়নত মনোনিৱেশ কৰি ভৱিষ্যত লক্ষ্যত উপনীত হ’বলৈ আহ্বান জনায়। অনুষ্ঠানত বৰপেটা জিলাৰ ৪৪ গৰাকী ছাত্ৰী আৰু বাক্সা জিলাৰ ১৩ গৰাকী ছাত্ৰীক স্কুটি প্ৰদান কৰা হয়।