ভাৰত-ভূটানৰ কূটনৈতিক সম্পৰ্কৰ সোণালী জয়ন্তী উপলক্ষে পালন অসম উৎসৱ

ভাৰত আৰু ভূটানৰ মাজত আনুষ্ঠানিক কূটনৈতিক সম্পৰ্ক স্থাপনৰ সোণালী জয়ন্তী অলপতে উদযাপন কৰা হয়। সেয়ে ইয়াৰ অংশ হিচাপে ভূটানৰ থিম্ফুত যোৱা বৃহস্পতিবাৰৰ পৰা আৰম্ভ হোৱা অসম উৎসৱ বৰ্ণাঢ্য কাৰ্যসূচীৰে শুকুৰবাৰে সামৰণি পৰে।

হোটেল তাজ তাছিত অনুষ্ঠিত অসম উৎসৱৰ উদ্বোধনী অনুষ্ঠানত ভূটানৰ গৃহ মন্ত্ৰী দাবা গিলচেন, ভূটানৰ গৃহ সচিব সোনাম টপগে, ভূটানস্থিত জয়দীপ সৰকাৰ আৰু ভূটানস্থিত বাংলাদেশৰ ৰাষ্ট্ৰদূত প্ৰমুখ্যে বহুতো লোক উপস্থিত থাকে।

আনহাতে অসমৰ পৰা সাংস্কৃতিক পৰিক্ৰমা বিভাগৰ মন্ত্ৰী নৱ কুমাৰ দলেৰ নেতৃত্বত ৮ জন বিধায়ক আৰু অন্যান্য বিষয়াসকলে কাৰ্যসূচীত অংশগ্ৰহণ কৰে।

অসম উৎসৱত উপস্থিত থাকি মন্ত্ৰী নৱ কুমাৰ দলেই ভূটানৰ লগত ভাৰত অসমৰ মাজত বছৰ বছৰ ধৰি চলি অহা সৌহাৰ্দ্যপূৰ্ণ সম্পৰ্ক আৰু ব্যৱসায় বাণিজ্য সম্পৰ্কে মন্তব্য দাঙি ধৰে।

ইয়াৰ লগতে শেহতীয়াকৈ ভূটান আৰু অসমৰ মাজৰ সম্পৰ্ক অধিক সুদৃঢ় হোৱা বুলি উল্লেখ কৰি মন্ত্ৰীজনে গুৱাহাটীত ভূটানে দূতাবাস স্থাপন কৰাৰ কথা প্ৰকাশ কৰে। তেওঁ লগতে ভূটানৰ প্ৰধান মন্ত্ৰীয়ে অসম ভ্ৰমণ কৰাৰ কথাও জানিবলৈ দিয়ে।

ইফালে অসম উৎসৱত সাংস্কৃতিক অনুষ্ঠান পৰিৱেশন কৰাৰ উদ্দেশ্যে অসমৰ পৰা সোমনাথ বৰাৰ নেতৃত্বত যোৱা শিল্পীৰ দলটোৱে প্ৰদৰ্শন কৰা বিহু আৰু অন্যান্য সাংস্কৃতিক অনুষ্ঠানে ভূটানবাসীক মন্ত্ৰমুগ্দ্ধ কৰে।