মণিপুৰৰ ইম্ফলত মুকলি ‘আয়ুছ স্প’ৰ্টছ মেডিচিন’
মঙলবাৰে মণিপুৰৰ ইম্ফলত আয়োজিত এক বৰ্ণাঢ্য অনুষ্ঠানত ৰাজ্য চৰকাৰৰ স্বাস্থ্য আৰু ক্ৰীড়া বিভাগে যুটীয়াভাবে মুকলি কৰে ‘আয়ুছ স্প’ৰ্টছ মেডিচিন’ ।
ইম্ফলৰ খুমান লামপাক ইণ্ডোৰ ষ্টেডিয়ামত আয়োজিত এই মুকলি অনুষ্ঠানত ৰাজ্যিক স্বাস্থ্য আৰু পৰিয়াল কল্যাণ মন্ত্ৰী এল জয়ন্তকুমাৰ সিং আৰু ক্ৰীড়া আৰু যুৱ মন্ত্ৰী লেটপাও হাওকিপ উপস্থিত থাকে।
মন্ত্ৰী জয়ন্তকুমাৰ সিঙে আয়ুছ সম্পৰ্কে জানিবলৈ, বুজিবলৈ আৰু ইয়াৰ উপকাৰিতা সম্পৰ্কে খেলুৱৈসকলক পৰামৰ্শ আগবঢ়ায়। লগতে কয় যে এনেকুৱা কিছুমান খেল আছে য’ত মনৰ একাগ্ৰতা অতিশয় দৰকাৰী।
মন মগজুৰ প্ৰশিক্ষণ তথা শক্তি প্ৰদানৰ বাবে যোগাসন উৎকৃষ্ট মাধ্যম বুলিও মন্ত্ৰী সিঙে তেওঁৰ ভাষণৰ জৰিয়তে উল্লেখ কৰে। ইয়াৰ উপৰি ৰাজ্যৰ খেলুৱৈসকলৰ কল্যাণৰ বাবে সকলো প্ৰকাৰৰ পদক্ষেপ গ্ৰহণ কৰিব বুলিও আশ্বাস প্ৰদান কৰে সিঙে।
আনহাতে ক্ৰীড়া আৰু যুৱ মন্ত্ৰী লেটপাও হাওকিপে তেওঁৰ ভাষণৰ জৰিয়তে নৱ প্ৰজন্মক ক্ৰীড়াৰ ক্ষেত্ৰত আগভাগ ল’বলৈ আহ্বান জনায়। খেলুৱৈসকলে উন্নত কেৰিয়াৰৰ গঢ়িবলৈ হ’লে উচিত শিক্ষাৰ আৱশ্যক। ক্ৰীড়া ক্ষেত্ৰত জড়িত থাকিলে বিভিন্ন চাকৰি পোৱাৰো সুবিধা থাকে বুলি কয় ক্ৰীড়া মন্ত্ৰীয়ে।
ইফালে ৰাজ্যখনৰ ক্ৰীড়া সন্থা আৰু বিষয়াসকলৰ মাজত চলি থকা বিতৰ্ক সম্পৰ্কে উদ্বেগ প্ৰকাশ কৰি মন্ত্ৰী হাওকিপে খেলুৱৈসকলক অন্য কথাত গুৰুত্ব প্ৰদান নকৰি কেৱল খেলতহে মনেনিৱেশ কৰিবলৈ অনুৰোধ জনায়।
কালি ‘আয়ুছ স্প’ৰ্টছ মেডিচিন’ মুকলি অনুষ্ঠানৰ লগত সংগতি ৰাখি ৰাজ্যখনৰ প্ৰায় ১২০০ খেলুৱৈৰ মাজত এই আয়ুছ স্প’ৰ্টছ মেডিচিন কীটছ বিতৰণ কৰা হয়।
এই অনুষ্ঠানত ক্ৰীড়া আৰু যুৱ বিভাগৰ সঞ্চালক এন প্ৰাভিন সিং, আয়ুছৰ সঞ্চালক ড০ এ গুণেশ্বৰ শৰ্মা, স্বাস্থ্য আৰু পৰিয়াল কল্যাণ বিভাগৰ সঞ্চালক ড০ কে ৰাজো সিং আৰু আয়ুছৰ অতিৰিক্ত সঞ্চালক ৱাই লুখই সিং উপস্থিত থাকে।
ইয়াৰ উপৰি অনুষ্ঠানটোত উপস্থিত থাকে ইম্ফলস্থিত নেশ্যনেল স্প’ৰ্টছ একাডেমিৰ ছাত্ৰ-ছাত্ৰীৰ লগতে প্ৰশিক্ষক, ক্ৰীড়া বিভাগৰ বিষয়া আৰু আয়ুছৰ বিষয়ববীয়া।