মণিপুৰ আৰক্ষীৰ নিচাজাতীয় সামগ্ৰী বিৰোধী অভিযানত আটক দুজন আফিং সৰবৰাহকাৰী

নিচাজাতীয় সামগ্ৰীৰ বিৰুদ্ধে অভিযান তীব্ৰতৰ কৰি তোলা মণিপুৰ আৰক্ষীৰ বাবে আন এক সফলতা। মণিপুৰ আৰক্ষী বিভাগৰ নাক্ৰটিকছ এণ্ড এফেয়াৰ্ছ অৱ ব’ৰ্ডাৰে (NAB) মঙলবাৰে দুজন আফিং সৰবৰাহকাৰী ব্যক্তিক আটক কৰিবলৈ সক্ষম হয়। আটকাধীন ব্যক্তি দুজনৰ পৰা আৰক্ষীয়ে প্ৰায় ৩ কিলোগ্ৰাম নিচাজাতীয় সামগ্ৰী আফিং জব্দ কৰে বুলি এক প্ৰেছ বিজ্ঞপ্তিত প্ৰকাশ পায়।

আটকাধীন লোক দুজন ক্ৰমে ছুৰাছন্দপুৰ জিলাৰ আছাম ৰাইফলছ কেম্পৰ সমীপৰ চংডোৰ টনচিং হেইজিনৰ পুত্ৰ টি ছেইবই(২০) আৰু ছেনাপতি জিলাৰ জোউপিৰ ঠাংলেন কিপগেন(৩৭) বুলি NABৰ আৰক্ষী অধীক্ষক ডব্লিউ বাসু সিঙে পএছ বিজ্ঞপ্তিৰ যোগে সদৰী কৰে।

সিঙে জনোৱা অনুসৰি জব্দ কৰা নিচাজাতীয় সামগ্ৰী আফিঙখিনিৰ স্থানীয় বজাৰ মূল্য প্ৰায় ২ লাখ ১০ হেজাৰ টকা হ’ব।

‘তেওঁলোকৰ পৰা কিছু আপত্তিজনক নথি পত্ৰও জব্দ কৰা হৈছে। আৰু এই সম্বন্ধত NAB আৰক্ষী থানাত দুয়োজন লোকৰ ওপৰত এটা গোচৰ ৰুজু কৰি তদন্ত আৰম্ভ কৰিছো’ বুলিও প্ৰেছ বিজ্ঞপ্তিত প্ৰকাশ পায়।

আনহাতে জিলা আৰক্ষীৰ এটা দলে পশ্চিম ইম্ফল জিলাৰ পৰা সোমবাৰে বিয়লি প্ৰায় ৩.৪৫ বজাত মাবই গিটি এলিয়াছ জেন(৩৯) নামৰ এজন কুকি ৰিভলুশ্যন ফ্ৰণ্টৰ(KRF) সক্ৰিয় সদস্যকো গ্ৰেপ্তাৰ কৰা বুলি জানিবলৈ দিয়ে।

গ্ৰেপ্তাৰ কৰা সদস্যজনৰ পৰা সজীৱ গুলীৰ লগতে এটা পিষ্টল আৰু অন্যান্য আপত্তিজনক নথি পত্ৰ জব্দ কৰে। ইতিমধ্যে সজস্য্যজনৰ ওপৰত ছেকমাই আৰক্ষী থানাত এটা গোচৰ ৰুজু কৰি অধিক তথ্য সংগ্ৰহৰ বাবে আৰক্ষীয়ে সোধা পোছা অব্যাহত ৰখা বুলি উক্ত প্ৰেছ বিজ্ঞপ্তিৰ জৰিয়তে সদৰী কৰে।