মাজুলীত ব’হাগৰ প্ৰথমটো বান : বুৰ গ’ল কমলাবাৰী-ভকত চাপৰিৰ মূল পথ

ব’হাগৰ প্ৰথমটো বানৰ কৱলত পৰিল মাজুলীৰ একাংশ অঞ্চল। কালিৰ পৰা নদীত বৃদ্ধি পোৱা জলপৃষ্ঠৰ বাবে মাজুলীৰ কাকৰিকতা-গুৱালগাওঁ মথাউৰিৰ বোকোৰা অঞ্চলত থকা শ্লুইচ গেইটলৈ ভাবুকি নামি আহিছে ।

প্ৰথমটো বানৰ খুন্দাই শ্লুইচ গেটৰ দুয়োপাৰৰ জিঅ’ বেগ খহাই নিয়াত শংকিত হৈ পৰিছে অঞ্চলটোৰ লোকসকল।

প্ৰথম পানী বাঢ়োতেই সংঘটিত অভাৱনীয় ঘটনাই উদ্বিগ্ন কৰি তুলিছে গাঁওবাসীক। আনফালে ৰাতিটোৰ ভিতৰতে বৃদ্ধি পোৱা ব্ৰহ্মপুত্ৰৰ জলপৃষ্ঠই বিচ্ছিন্ন কৰি পেলালে কমলাবাৰী-ভকত চাপৰি সংযোগী পথ।

জানিব পৰামতে এই পথটো ১৭খন গাঁৱৰ লোকৰ অহা-যোৱাৰ মূল উপায় আছিল আৰু একমাত্ৰ পথটো বানত বুৰ যোৱাত সমস্যাৰ সৃষ্টি হৈছে অঞ্চলবাসীৰ। যোৱা বছৰত এই পথত বাঁহ-কাঠেৰে এখন দলং নিৰ্মাণ কৰিছিল যদিও যোৱাবছৰেই বানে উটুৱাই নিয়াৰ পিছত পুনৰ এতিয়া সমস্যাৰ সন্মুখীন হৈছে গাঁওবাসী।

ব’হাগ মাহ পৰাৰ লগে লগে প্ৰথম বৰষুণৰ বানে মাজুলীত সমস্যাৰ সৃষ্টি কৰাত স্বাভাৱিকতে শংকিত হৈ পৰিছে মাজুলীবাসী।

তদুপৰি, দীৰ্ঘদিন ধৰি বানপানীৰ সমান্তাৰলকৈ হোৱা খহনীয়াই মাজুলীবাসীৰ নিদ্ৰা হৰণ কৰি আহিছে।