মাজুলীত ৰাজ্যিক ভিত্তিত আলি আঃয়ে লৃগাং : উপস্থিত থাকিব ৰাজ্যপাল, মুখ্য মন্ত্ৰী সোণোৱাল
মিচিং সকলৰ কৃষিভিত্তিক বসন্ত উৎসৱ আলি আঃয়ে লৃগাং অসম চৰকাৰৰ সাংস্কৃতিক সঞ্চালকালয়ৰ উদ্যোগত মাজুলী জিলাৰ জেংৰাইমুখ উচ্চতৰ মাধ্যমিক বিদ্যালয় খেলপথাৰত বৰ্ণাঢ্য কাৰ্যসূচীৰে কেন্দ্ৰীয়ভাৱে উদযাপন কৰিবলৈ লোৱা হৈছে।
এই কথা চৰকাৰৰ সাংস্কৃতিক সঞ্চালকালয়ৰ এটা সূত্ৰই এন ই নাওক জনাইছে। সূত্ৰটোৱে জনোৱা মতে ১৪ তাৰিখত দিনজোৰা কাৰ্য্যসূচীৰে মিচিং সম্প্ৰদায়টোৰ এই অন্যতম উৎসৱটো আয়োজনৰ দিহা কৰা হৈছে। ইয়াত মিচিং লোকসকলৰ সংস্কৃতিৰ বিভিন্ন দিশ প্ৰতিফলন কৰিব পৰাকৈ কাৰ্য্যসূচী লোৱা হৈছে। ইয়াৰ সৈতে সংগতি ৰাখি এখন প্ৰদৰ্শনীও পতা হৈছে। প্ৰদৰ্শনী দ্বাৰা উন্মোচন কৰিব মাজুলী জিলাৰ উপায়ুক্ত পল্লৱ গোপাল ঝাই।
আনহাতে দিনৰ ১২ বজাৰ পৰা অনুষ্ঠিত হ’ব লগা মুকলি সভাত উপস্থিত থাকিব মুখ্য মন্ত্ৰী সৰ্বানন্দ সোণোৱাল, যিজন মাজুলীৰ পৰাই বিধানসভালৈ নিৰ্বাচিত হৈ আহিছে। মুখ্য মন্ত্ৰীৰ লগতে মিচিং লোক সংস্কৃতি প্ৰদৰ্শন অনুষ্ঠানত ৰাজ্যপাল জগদীশ মুখীও উপস্থিত থাকিব বুলি সূত্ৰটোৱে জনাইছে। ইয়াৰ উপৰি সাংস্কৃতিক পৰিক্ৰমা মন্ত্ৰী নৱ কুমাৰ দলেও উপস্থিত থাকিব। তাৰোপৰি অৱসৰপ্ৰাপ্ত অধ্যক্ষ ইন্দ্ৰেশ্বৰ পেগু, সাংসদ প্ৰদান বৰুৱা, ৰামেশ্বৰ তেলী, কামাখ্যা প্ৰসাদ তাছা, বিধায়ক ডাঃ ৰণোজ পেগু, ভুৱন পেগু আদিও উপস্থিত থাকিব।
বিয়লি সাংস্কৃতিক অনুষ্ঠান উদ্বোধন কৰিব মিচিং দৃৰ্বৃ কেবাঙৰ প্ৰাক্তন সভাপতি ড০ বিদ্যেশ্বৰ দলেই।
সূত্ৰটোৱে লগতে জনায় যে কাৰ্য্যসূচীৰ মাজতে মুখ্য মন্ত্ৰী সৰ্বানন্দ সোণোৱালে মাজুলীত নিৰ্মাণ হ’ব লগীয়া ‘সংহত কাৰ্যালয় ভৱন আৰু বাসগৃহ চৌহদ’ৰ আধাৰশিলাও স্থাপন কৰিব। লগতে তেওঁ নৌকা এম্বুলেন্স সেৱাও মুকলি কৰিব।
আনহাতে মাজুলী জিলা প্ৰশাসনৰ পৰা জনোৱা খবৰ মতে আলি আঃয়ে লৃগাং উপলক্ষে ১৪ ফেব্ৰুৱাৰি দিনটোত মাজুলী জিলা স্থানীয় বন্ধ ঘোষণা কৰা হৈছে। মাজুলীৰ উপায়ুক্ত পল্লৱ গোপাল ঝাই জাৰি কৰা এই সম্পৰ্কীয় নিৰ্দেশনা অনুসৰি ১৪ ফেব্ৰুৱাৰিত জিলাখনৰ ৰাজ্য আৰু কেন্দ্ৰীয় চৰকাৰৰ সকলো কাৰ্যালয়, প্ৰতিষ্ঠান, বেংক, শিক্ষানুষ্ঠান আদি বন্ধ থাকিব।