মৰ্মান্তিক! NEET পৰীক্ষাৰ প্ৰস্তুতি চলাই থকা ছাত্ৰই গ্ৰহণ কৰিলে চৰম সিদ্ধান্ত

এজনৰ পিছত আন এজন শিক্ষাৰ্থীয়ে আত্মহত্যা কৰিছে শিক্ষা নগৰী হিচাপে  খ্যাত  ৰাজস্থানৰ কোটাত। তথ্য অনুসৰি  চলিত বৰ্ষতে কোটাত ২৬ গৰাকী ছাত্ৰ-ছাত্ৰীয়ে আত্মহত্যা কৰিছে। 

এইবাৰ NEET পৰীক্ষাৰ প্ৰস্তুতিৰ বাবে উত্তৰ প্ৰদেশৰ পৰা কোটালৈ অহা এজন ২০ বছৰীয়া ছাত্ৰই  আত্মহত্যা কৰাৰ খবৰ পোহৰলৈ আহিছে।

আৰক্ষীয়ে জনোৱা মতে, বুধবাৰে আত্মহত্যা কৰা ছাত্ৰ গৰাকীয়ে  কোচিং ইনষ্টিটিউট নোহোৱাকৈয়ে অকলেই মেডিকেল এণ্ট্ৰেন্স পৰীক্ষা NEETৰ বাবে প্ৰস্তুতি চলাইছিল ।

উল্লেখ্য যে, প্ৰতি বছৰে দেশৰ বিভিন্ন প্ৰান্তৰ পৰা লাখ লাখ ছাত্ৰ-ছাত্ৰী ৰাজস্থান কোটালৈ অভিযান্ত্ৰিক আৰু চিকিৎসা পৰীক্ষাৰ বাবে প্ৰস্তুতি চলাবলৈ আহে।  এইদৰে এই চহৰখন কাৰ্যতঃ কোচিং হাব হৈ পৰিছে। 

কিন্তু প্ৰতি বছৰে পঢ়া-শুনাৰ হেঁচা সহ্য কৰিব নোৱাৰি একাংশ ছাত্ৰ-ছাত্ৰীয়ে আত্মহত্যা কৰে। যোৱা বছৰ কোটাত আত্মহত্যা কৰা ছাত্ৰ-ছাত্ৰীৰ সংখ্যা আছিল ১৫ জন। কিন্তু এই বছৰৰ প্ৰথম ৯ মাহত সেই সংখ্যা অতিক্ৰম কৰিছে। কোটা আৰক্ষীয়ে জনোৱা মতে, ইতিমধ্যে মুঠ ২৬ গৰাকী ছাত্ৰ-ছাত্ৰীয়ে আত্মহত্যা কৰিছে।

বিগত কেইবছৰমানৰ পৰা কোটালৈ অহা ছাত্ৰ-ছাত্ৰীৰ মাজত পঢ়া-শুনাৰ পাহাৰ সদৃশ হেঁচা আৰু বিফল হোৱাৰ ভয়ৰ ফলত হোৱা হতাশাৰ ঘটনাও দেখা গৈছে। সেই হতাশাৰ ফলত আত্মহত্যাৰ প্ৰৱণতা বাঢ়িছে। 

সেয়ে কিছুদিনৰ পৰা ছাত্ৰ-ছাত্ৰীৰ মাজত হেঁচা কমাবলৈ জিলা প্ৰশাসনে কোটাৰ শিক্ষানুষ্ঠানসমূহক আগন্তুক দুমাহলৈ কোনো পৰীক্ষা অনুষ্ঠিত নকৰিবলৈ অনুৰোধ জনাইছে। ইয়াৰ উপৰিও শিক্ষানুষ্ঠানসমূহে হোষ্টেলৰ মুৰব্বী, মেছ কৰ্মী আৰু খাদ্য সেৱা প্ৰদানকাৰীসকলক হোষ্টেল আৰু মেছত থকা ছাত্ৰ-ছাত্ৰীৰ মাজত মানসিক চাপ আৰু হতাশাৰ লক্ষণসমূহ নিৰীক্ষণ কৰিবলৈ পৰামৰ্শ দিছে।