যুৱতীক অশালীন ব্যৱহাৰৰ মিছা অভিযোগত যুৱকক মাৰপিটৰ ঘটনাৰ প্ৰতিবাদ : সেও মানি আৰক্ষীয়ে মুকলি কৰি দিলে অভিযুক্তক

এগৰাকী কলেজীয়া ছাত্ৰীক বাছত অশালীন ব্যৱহাৰ কৰাৰ ঘটনাক কেন্দ্ৰ কৰি ৩০ জুন অৰ্থাৎ শনিবাৰে তিনিচুকীয়া জিলাৰ লেখাপানীত সৃষ্টি হৈছিল এক অবাঞ্চিত পৰিস্থিতি। জানিব পৰা মতে কলেজীয়া ছাত্ৰীগৰাকীক অশালীন ব্যৱহাৰ কৰাৰ অভিযোগ তুলি কালি লেখাপানীৰ একাংশ ৰাইজে ৰাহুল সোণোৱালৰ লগতে তেওঁৰ মাতৃ-পত্নী সহ আত্মীয়ক একাংশ ৰাইজে বেয়াকৈ মাৰধৰ কৰে।

ইফালে ঘটনাৰ খবৰ পোৱাৰ লগে লগে ঘটনাস্থলীত আৰক্ষী উপস্থিত হৈ লোককেইজনৰ পৰা যুৱকজনক উদ্ধাৰৰ বাবে আৰক্ষীয়ে চেষ্টা চলাইছিল যদিও উত্তেজিত ৰাইজে আৰক্ষীকো আবদ্ধ কৰি ৰাখে। আৰু ইয়াক কেন্দ্ৰ কৰিয়ে আজি দ্বিতীয় দিনাও উত্তাল হৈ থাকে লেখাপানী।

উল্লেখ্য যে আজি অভিযুক্ত যুৱক ৰাহুল সোণোৱালৰ গাঁৱৰ শতাধিক ৰাইজে ৰাহুলক বিনাচৰ্তে মুক্তিৰ লগতে কালি যুৱকজনৰ লগতে তেওঁৰ সম্বন্ধীয়ক প্ৰহাৰ কৰাৰ সৈতে জড়িত পাঁচগৰাকী ব্যক্তিক ২৪ ঘণ্টাৰ ভিতৰত গ্ৰেপ্তাৰ কৰাৰ দাবীত লেখাপানী আৰক্ষী থানাৰ সন্মুখত ২ ঘণ্টাৰ বাবে ১৫৩ নং ৰাষ্ট্ৰীয় ঘাইপথ অৱৰোধ কৰি পৰিৱেশ উত্তাল কৰি তোলে।

শতাধিক লোকে অংশগ্ৰহণ কৰা পথ অৱৰোধ কাৰ্যসূচীৰ ফলত ৰাষ্ট্ৰীয় ঘাইপথৰ যাতায়ত ব্যাহত হৈ পৰাত পাছত প্ৰতিবাদস্থলীত মাৰ্ঘেৰিটা মহকুমাৰ দণ্ডাধীশ উপস্থিত হৈ ৰাইজৰ দাবী পূৰণ কৰাৰ আশ্বাস প্ৰদান কৰে। ইয়াৰ উপৰি প্ৰতিবাদকাৰীৰ প্ৰতিবাদত সেও মানি অৱশেষত ৰাহুল সোণোৱালক আৰক্ষীয়ে মুকলি কৰি দিয়াত ৰাইজে পথ অৱৰোধ প্ৰত্যাহাৰ কৰে।

ইপিনে ৰাইজে বান্ধি দিয়া ২৪ ঘণ্টা সময়সীমাৰ ভিতৰত মৰেল পুলিচকেইজনক গ্ৰেপ্তাৰ নকৰিলে ব্যাপক প্ৰতিবাদ গঢ়ি তোলাৰ হুংকাৰ প্ৰদান কৰিছে।

প্ৰকৃততে ষড়যন্ত্ৰমূলক ভাৱে ৰাহুল সোণোৱালে কলেজীয়া ছাত্ৰীক অশালীন ব্যৱহাৰ কৰাৰ অভিযোগ আনিছিল বুলি আজি প্ৰতিবাদকাৰী ৰাইজে উল্লেখ কৰিছে। প্ৰকৃততে কি কাৰণত এক উত্তেজনাপূৰ্ণ ঘটনা শনিবাৰৰে পৰা লেখাপানী অঞ্চলত তীব্ৰ চাঞ্চল্য অব্যাহত থাকিল সেয়া আৰক্ষীৰ অনুসন্ধানতহে পোহৰলৈ আহিব।