লুইতৰ বুকুৰ ‘লহৰে চাপৰি’ত সামূহিক গৃহৰ আধাৰশিলা স্থাপন কৰিলে বন বিভাগে

বোকাখাত মহকুমাৰ মাজুলী ( Majuli )ৰ সীমাত, ব্ৰহ্মপুত্ৰৰ বুকুৰ লহৰ চাপৰিত আজি ২৫ মে’ত এটা সামূহিক গৃহৰ আধাৰশিলা স্থাপন কৰা হয়৷ আধাৰশিলা স্থাপন কৰে পূব অসম বন্যপ্ৰাণী সংমণ্ডলৰ প্ৰাধিকাৰী তথা কাজিৰঙাৰ ডি এফ অ’ ৰোহিনী বল্লভ শইকীয়াই৷

চাপৰিটোলৈ আগতে অহাৰ সময়ত মুখ্য মন্ত্ৰী সৰ্বানন্দ সোণোৱালে এই গৃহটো নিৰ্মাণৰ দায়িত্ব বন বিভাগৰ হাতত অৰ্পণ কৰিছিল৷

লহৰে চাপৰি মাধ্যমিক বিদ্যালয়ৰ প্ৰধান শিক্ষক জান মৰাঙে আঁত ধৰা আজিৰ আধাৰশিলা স্থাপন অনুষ্ঠানত চাপৰিটোৰ যথেষ্টসংখ্যক ৰাইজ উপস্থিত থাকে।

বন বিভাগে আগবঢ়োৱা ২০ লাখ টকাৰ অনুদানেৰে লহৰে চাপৰি পাৰিপাৰ্শ্বিক উন্নয়ন সমিতিয়ে এই সামূহিক গৃহটোৰ নিৰ্মাণৰ কাম আৰম্ভ কৰিছে৷

চাপৰিটোৰ জনসাধাৰণৰ কল্যাণৰ বাবে পাৰিপাৰ্শ্বিক উন্নয়ন সমিতিৰ জড়িয়তে বন বিভাগে পাৰ্য্যমানে সহযোগ কৰিব বুলি আজিৰ অনুষ্ঠানতে জনায় ডি এফ অ’ ৰোহিনী বল্লভ শইকীয়াই।

উল্লেখযোগ্য যে মুখ্যমন্ত্ৰীৰ প্ৰতিশ্ৰুতিৰ পাচতেই বন বিভাগৰ প্ৰধান মুখ্য বন সংৰক্ষক নিৰঞ্জন কুমাৰ বাসুৰ তৎপৰতাত লহৰে চাপৰিত কাজিৰঙা ৰাষ্ট্ৰীয় উদ্যানৰ অধীনত এখন পাৰিপাৰ্শ্বিক উন্নয়ন সমিতি গঠন কৰা হৈছিল৷ চাপৰিটোত ৰাজহুৱা সভা এখনত অশ্বত্থামা পেগুক সভাপতি, বন বিষয়া তৰুণ গগৈক সদস্য সচিব আৰু চাপৰিৰ প্ৰতি ঘৰ বাসিন্দাৰ এজনক সদস্য হিচাবে লৈ এই সমিতি গঠন কৰা হয়৷

গঁড়ৰ অন্যতম বিচৰণ ভূমি এই লহৰে চাপৰিত এটা আৰক্ষী নিৱেস নিৰ্মাণৰ কামো আৰম্ভ হৈছে৷ পৰিভ্ৰমী গঁড়ৰ নিৰাপত্তাৰ বাবে চাপৰিটোত গোলাঘাট বন সংমণ্ডলৰ অধীনত এটা বন শিৱিৰ নিৰ্মাণৰ কামো আৰম্ভ হৈছে৷