শোণিতপুৰৰ চাৰিদুৱাৰৰ নঘৰীয়া গাঁৱত বনৰীয়া হাতীৰ উপদ্ৰৱ, বাসগৃহ ধ্বংস

যোৱা নিশা শোণিতপুৰ জিলাৰ চাৰিদুৱাৰ এলেকাৰ নঘৰীয়া গাঁৱত এটা বনৰীয়া হাতী প্ৰৱেশ কৰি গাঁওবাসীসকলক সন্ত্ৰস্ত কৰি তুলিছে। বনৰীয়া হাতীটোৱে নঘৰীয়া গাঁৱত প্ৰৱেশ কৰি তাৰ আগত পৰা সমস্তখিনি এফালৰ পৰা ধ্বংস কৰি গৈছে।

হাতীটোৱে ৰেণুমাই মেচ নামৰ এগৰাকী মহিলাৰ ঘৰটো ভাঙি তচনচ কৰিছে।হাতীটোৱে ৰেণুমাই মেচৰ ঘৰৰ বেৰ, দুৱাৰ, খিৰিকী ভাঙি পেলাইছে। ঘৰৰ আচবাবপত্ৰ, পাকৰৰ বাচন-বৰ্তন লণ্ডভণ্ড কৰি পেলাইছে।  মানুহগৰাকীৰ জীৱিকাৰ একমাত্ৰ সম্বল সৰু ভড়ালঘৰটোৰ বেৰ ভাঙি শস্য নষ্ট কৰি পেলাইছে। হাতীটোৰ আক্ৰমণৰ বলি হৈ হৈ ৰেণুমাই মেচ এতিয়া সৰ্বস্বান্ত হৈ পৰিছে।

বহু সময় ধৰি চেষ্টা কৰি অৱশেষত গাঁওবাসীসকলে হাতীটোক খেদি পঠিয়াবলৈ সক্ষম হয়। আনহাতে গাঁওবাসীয়ে অভিযোগ কৰিছে যে ৰাতিয়েই বন বিভাগৰ লোকক খবৰ দিয়া হৈছিল যদিও বাতৰি যুগুতোৱা সময়লৈকে বন বিভাগৰ লোক গাঁওখনত আহি উপস্থিত হোৱা নাই।

অসমত শেহতীয়াভাৱে বনৰীয়া হাতী আৰু মানুহৰ সংঘাত ক্ৰমে বাঢ়ি অহাটো পৰিলক্ষিত হৈছে। বিশেষজ্ঞসকলৰ মতে  হাতীৰ চিৰন্তন বসতিস্থানসমূহলৈ মানুহৰ বসতি বাঢ়ি যোৱাৰ বাবেই খাদ্য আৰু বাসস্থানৰ সংকটত ভোগা হাতীয়ে মানুহৰ বাসস্থানলৈ প্ৰৱেশ কৰিবলৈ লৈছে। ফলত আৱশ্যম্ভৱীভাৱে বাঢ়ি গৈ আছে হাতী আৰু মানুহৰ সংঘাত।