শ্রীমন্ত শংকৰদেৱ বিশ্ববিদ্যালয়ৰ সমাৱৰ্তনত উন্নয়নৰ আশ্বাস ৰাজ্যপালৰ

‘মহাপুৰুষ শংকৰদেৱৰ দৰ্শনত আছিল মানৱতাবাদী চিন্তা। মহাপুৰুষগৰাকীয়ে সমাজত নৈতিক শিক্ষা প্ৰৱৰ্তন কৰিছিল,’’-নগাঁও চহৰৰ খগেন মহন্ত প্ৰেক্ষাগৃহত অনুষ্ঠিত মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ সমাৱৰ্তনত ভাষণ দি শনিবাৰে ৰাজ্যপাল জগদীশ মুখীয়ে এইদৰে কয়।

বিশ্ববিদ্যালয়খনৰ ভিজিটৰ হিচাপে সভাপতিত্ব  কৰি দিয়া ভাষণত ৰাজ্যপালগৰাকীয়ে কয় যে মহাপুৰুষ শংকৰদেৱ এগৰাকী সমাজ সংস্কাৰক আছিল। তেওঁ এগৰাকী বিদগ্ধ পণ্ডিত আৰু মহান তথা বিৰল প্ৰতিভাধৰ ব্যক্তি আছিল।

ৰাজ্যপালগৰাকীয়ে সকলোকে শংকৰদেৱৰ আদৰ্শৰে অনুপ্ৰাণিত হ’বলৈ আহ্বান জনায়।

ব্যক্তিগত খণ্ডৰ শ্ৰীমন্ত শংকৰদেৱ বিশ্ববিদ্যালয়খনে বিভিন্ন বিষয়ৰ লগতে শংকৰদেৱৰ জীৱন দৰ্শনৰ বিষয়ে শিক্ষা প্ৰদান কৰা কাৰ্যক তেওঁ প্ৰশংসা কৰে। এই বিশ্ববিদ্যালয়খনৰ উন্নয়নৰ বাবে চৰকাৰে সকলো ব্যৱস্থা গ্ৰহণ কৰিব বুলি ৰাজ্যপালগৰাকীয়ে আশ্বাস দিয়ে।

সমাৱৰ্তনত উপস্থিত থাকি তেজপুৰ কেন্দ্ৰীয় বিশ্ববিদ্যালয়ৰ প্ৰাক্তন উপাচাৰ্য ড০ মিহিৰকান্তি চৌধুৰীয়ে কয় যে আমাৰ শিক্ষা ব্যৱস্থাৰ জৰিয়তে আমি সামাজিক অৰ্থনৈতিক উন্নয়নৰ বাবে প্ৰশিক্ষণ দিব লাগিব।

তেওঁ ছাত্ৰ-ছাত্ৰীসকলক অসমৰ মহান দাৰ্শনিক শ্ৰীমন্ত শংকৰদেৱৰ চিন্তা-আদৰ্শৰে পৰিচালিত হ’বলৈ আহ্বান জনায়।

সমাৱৰ্তনত বিশ্ববিদ্যালয়খনৰ আচাৰ্য ভবেন্দ্ৰ নাথ ডেকায়ো ভাষণ দিয়ে। আদৰণি ভাষণ আগবঢ়ায় বিশ্ববিদ্যালয়খনৰ উপাচাৰ্য ড০ কন্দৰ্প কুমাৰ ডেকাই।

সভাত বিশ্ববিদ্যালয়খনৰ পঞ্জীয়ক ড০ ৰাতুল চন্দ্ৰ বৰা, কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ৰ উপাচাৰ্য ড০ হিতেশ ডেকাৰ লগতে কেইবাজনো বিশিষ্ট ব্যক্তিয়ে অংশগ্ৰহণ কৰে।

সমাৱৰ্তনত ৰাজ্যপালগৰাকীয়ে বিশ্ববিদ্যালয়খনৰ দুগৰাকী শিক্ষয়ত্ৰীক এম পিল আৰু আন ৮২ গৰাকী শিক্ষাৰ্থীক স্নাতকোত্তৰ ডিগ্ৰী প্ৰদান কৰে।