শ্ৰীমন্ত শংকৰদেৱ কলাক্ষেত্ৰত সাহিত্যৰথী লক্ষ্মীনাথ বেজবৰুৱাৰ স্মাৰক সংগ্ৰহালয় উদ্বোধন

শ্ৰীমন্ত শংকৰদেৱ কলাক্ষেত্ৰত সোমবাৰে সাহিত্যৰথী লক্ষ্মীনাথ বেজবৰুৱা স্মাৰক  সংগ্ৰহালয়ৰ উদ্বোধন কৰা হয়। শংকৰদেৱ কলাক্ষেত্ৰৰ সংগীত-নাটক ভৱনৰ প্ৰথম মহলাত স্থাপন কৰা এই সংগ্ৰহালয়টোত সাহিত্যৰথী বেজবৰুৱা আৰু তেওঁৰ পৰিয়ালবৰ্গৰ সৈতে বিভিন্ন স্থানত তোলা এলানি বিৰল ফটো প্ৰদৰ্শন কৰা হয়। লগতে তেখেতৰ হাতৰ আখৰৰ নমুনা, পাণ্ডুলিপি, কৰ্মৰাজি আৰু তেখেতৰ স্মৃতি জড়িত হৈ থকা বিভিন্ন বস্তুৰ ফটোও ইয়াতে প্ৰদৰ্শন কৰা হয়।

এই সংগ্ৰহালয়টো উদ্বোধন কৰে সাংস্কৃতিক পৰিক্ৰমা মন্ত্ৰী নব দলেই।

উদ্বোধনী ভাষণত মন্ত্ৰীগৰাকীয়ে অসমীয়া ভাষা আৰু সাহিত্যলৈ সাহিত্যৰথীগৰাকীৰ অসামান্য বৰঙণি আৰু অসমীয়া জাতীয়তাবাদক গঢ় দিয়াত তেওঁৰ অৱদানৰ কথা উল্লেখ কৰে।তেওঁ আৰু কয় যে এই সংগ্ৰহালয়টোত এই বিৰাট প্ৰতিভাশালী ব্যক্তিগৰাকীৰ অমূল্য কৰ্মৰাজি সংৰক্ষণ আৰু মানুহৰ মাজলৈ লৈ যোৱাৰ বাবে যথাসাধ্য সকলোখনি কৰিব।

লেখক, সমালোচক লক্ষ্মীনাথ তামুলীয়ে বেজবৰুৱাৰ অসামান্য অৱদানৰ কথা ৰোমান্থন কৰি খেদ প্ৰকাশ কৰে অসমীয়া মানুহে সাহিত্যৰথীগৰাকীৰ সঠিক মূল্যায়ন কৰাত ব্যৰ্থ হৈছে। এচাম অসমীয়াই অসমীয়া ভাষা আৰু সাহিত্যক অত্যন্ত অৱহেলা কৰিবলৈ ধৰাৰ কথাও তেওঁ উল্লেখ কৰে।

বেজবৰুৱাৰ সম্পাদনাত প্ৰকাশ হোৱা ‘বাঁহী’ ছপা কৰা সেই ঐতিহাসিক ছপাশালটো সংৰক্ষণ কৰাত গুৱাহাটী বিশ্ববিদ্যালয় নাইবা অসম সাহিত্য সভাই কোনো উদ্যোগ ল’বলৈ অস্বীকাৰ কৰা কথাটোত সাহিত্যিক তামুলীয়ে ক্ষোভ প্ৰকাশ কৰে। বিশ্বত অসমীয়াক এটা ভাষিক জাতি হিচাপে পৰিচয় কৰাই দিয়া সাহিত্যৰথী বেজবৰুৱাৰ প্ৰতি অনুষ্ঠান দুটাই দেখুওৱা এনে মনোভাৱক তেওঁ অত্যন্ত অসন্মানজনক বুলি মন্তব্য কৰে।

শ্ৰীমন্ত শংকৰদেৱ কলাক্ষেত্ৰ সমাজৰ উপ সভাপতি তথা সাংস্কৃতিক কৰ্মী সূৰ্য হাজৰিকাই তেওঁৰ ভাষণত কয় যে এই সংগ্ৰহালয়টো সাহিত্যৰথীগৰাকীৰ প্ৰতি যথাৰ্থ সন্মানৰ আৰু এয়া অসমীয়াৰ দীৰ্ঘ দিনীয়া এটা প্ৰয়োজন। তেওঁ আৰু কয় যে অধিকাংশ সময়েই অসমৰ বাহিৰত থকা বাবে সাহিত্যৰথীৰ স্মৃতিজড়িত বস্তু বিচাৰি পাবলৈ টান।

তেওঁ আৰু কয় যে ১৯৩৩ চনত বেজবৰুৱাই বৰোদাত ফাইজি ৰাও গাইকোৱাৰৰ আমন্ত্ৰণক্ৰমে প্ৰদান কৰা ‘হিষ্টৰি অব বৈষ্ণবিজম ইন ইণ্ডিয়া’ ভাষণটো বৰোদা ৰাজ্যিক সংগ্ৰহালয়ত সংৰক্ষিত হৈ আছে। হাজৰিকাই জনাইছে যে ইয়াৰে এটা প্ৰতিলিপি কলাক্ষেত্ৰত স্থাপন কৰা এই সংগ্ৰহালয়তো দৰ্শনাৰ্থীৰ বাবে ৰখা হৈছে।

লোক-সংস্কৃতি বিশাৰদ ড০ অনিল শইকীয়া, নেশ্যনেল মিউজিয়ামৰ সঞ্চালক প্ৰধান ৰবীন দেৱ চৌধুৰী, সাংস্কৃতিক পৰিক্ৰমা আয়ুক্ত আৰু সচিব প্ৰীতম শইকীয়া আৰু লক্ষ্মীনাথ বেজবৰুৱাৰ পৰিনাতি সত্যকাম বেজবৰুৱায়ো উদ্বোধনী অনুষ্ঠানত ভাষণ ৰাখে।