ষ্ট্ৰাণ্ডা স্মৃতি বক্সিং টুৰ্নামেণ্টৰ ফাইনেলত এম চি মেৰীকম

ভাৰতীয় বক্সিং জগতৰ তাৰকা তথা পাঁচবাৰৰ বিশ্ব চেম্পিয়ন মণিপুৰৰ মহিলা বক্সাৰ এম চি মেৰীকমে বুলগেৰিয়াত চলি থকা ৬৯ সংখ্যক ষ্ট্ৰাণ্ডা স্মৃতি বক্সিং টুৰ্নামেণ্টৰ ফাইনেলত প্ৰৱেশ কৰিছে।

প্ৰতিযোগিতাখনত ৪৮ কিলোগ্ৰাম শাখাত প্ৰতিদ্বণ্ডিতা আগবঢ়োৱা অলিম্পিকৰ ব্ৰঞ্জ পদক বিজয়ী মেৰীকমে ফাইনেলত প্ৰৱেশ কৰাৰ লগে লগে ক্ৰমাগত তৃতীয়টো আন্তৰ্জাতিক সোণৰ পদকৰ আশা সজীৱ কৰি ৰাখিলে।

উল্লেখ্য যে এম চি মেৰীকমে বুলগেৰিয়াত অনুষ্ঠিত বক্সিং প্ৰতিযোগিতাখনৰ পূৰ্বে এছিয়ান চেম্পিয়নশ্বিপ আৰু ইণ্ডিয়া অ’পেনত একোটাকৈ স্বৰ্ণ পদক লাভ কৰিবলৈ সক্ষম হৈছিল।

প্ৰতিযোগিতাখনৰ চেমি ফাইনেলত মেৰীকমে চীনৰ য়ে জীয়ালীৰ লগত যথেষ্ট প্ৰত্যাহ্বানৰ সন্মুখীন হৈছিল যদিও অৱশেষত শেষ হাঁহি মাৰিবলৈ সক্ষম হয় মেৰীকম। আৰু লগে লগে ক্ৰমাগত তৃতীয়টো আন্তৰ্জাতিক সোণৰ পদক লাভ কৰাৰো সম্ভাৱণা সজীৱ কৰি তোলে।

আনহাতে ইয়াৰ পূৰ্বে পাঁচবাৰৰ বিশ্ব চেম্পিয়ন মেৰীকমে প্ৰতিযোগিতাখনৰ কোৱাৰ্টাৰ ফাইনেলত ৰোমানিয়াৰ ষ্টেলোটা ডুটাক পৰাজিত কৰি ছেমি ফাইনেললৈ অগ্ৰসৰ হৈছিল।

উল্লেখ্য যে ইউৰোপৰ আটাইতকৈ পুৰণি এই বক্সিং প্ৰতিযোগিতাখনত মণিপুৰৰ এইগৰাকী ৩৫ বৰ্ষীয় বক্সাৰৰ উজ্জীৱিত প্ৰদৰ্শনত স্বাভাৱিকতে ক্ৰীড়া প্ৰেমীৰ মাজত আনন্দৰ লহৰ উঠিছে।