নামৰূপৰ সমাজকৰ্মী, অসম আন্দোলনৰ নেতা অসীম ৰাজখোৱাৰ দেহাৱসান

বিশিষ্ট সমাজ সেৱক, অসম আন্দোলনৰ এগৰাকী সক্ৰিয় নেতা আৰু হিন্দুস্তান ফাৰ্টিলাইজাৰ কৰ্পোৰেশ্যনৰ ফাৰ্টিলাইজাৰ শ্ৰমিক ইউনিয়নৰ সভাপতি নামৰূপৰ অসীম ৰাজখোৱাৰ দেওবাৰে নিজা বাসভৱনত পৰলোকপ্ৰাপ্তি ঘটে।

মৃত্যুৰ সময়ত ৰাজখোৱাৰ বয়স আছিল ৬৯ বছৰ।

গোলাঘাটৰ কমাৰবন্ধাত অসীম ৰাজখোৱাই জন্মগ্ৰহণ কৰিছিল।

হিন্দুস্তান ফাৰ্টিলাইজাৰ কৰ্পোৰেশ্যনৰ (বৰ্তমান ব্ৰহ্মপুত্ৰ ভেলী ফাৰ্টিলাইজাৰ কৰ্পোৰেশ্যন লিমিটেড) শ্ৰমিক ইউনিয়নৰ সভাপতি ৰাজখোৱাই ২০০৭ চনত চাকৰিৰ পৰা অৱসৰ গ্ৰহণ কৰে।

উল্লেখযোগ্য যে হিন্দুস্তান ফাৰ্টিলাইজাৰ কৰ্পোৰেশ্যন লিমিটেডৰ পৰা ব্ৰহ্মপুত্ৰ ভেলী ফাৰ্টিলাইজাৰ কৰ্পোৰেশ্যন লিমিটেড পৃথক হোৱাৰ সময়ত ৰাজখোৱাই হিন্দুস্তান ফাৰ্টিলাইজাৰ কৰ্পোৰেশ্যন লিমিটেডৰ কৰ্মচাৰীসকলক নেতৃত্ব দি ফাৰ্টিলাইজাৰ কৰ্পোৰেশ্যনৰ শীৰ্ষ বিষয়াসকলক পতিয়ন নিয়াবলৈ সক্ষম হৈছিল।

অসমৰ মুখ্যমন্ত্ৰী সৰ্বানন্দ সোণোৱালে অসম আন্দোলনৰ এই বিশিষ্ট নেতাগৰাকীৰ মৃত্যুত শোক প্ৰকাশ কৰিছে।

অসম সাহিত্য সভাৰ নামৰূপ শাখা, সদৌ অসম ছাত্ৰ সন্থাৰ নামৰূপ শাখা, নামৰূপৰ জ্যেষ্ঠ নাগৰিক, নামৰূপৰ সমলয় কবি চক্ৰ, নামৰূপ মহাবিদ্যালয় পৰিচালনা সমিতি, ভাৰতীয় জনতা পাৰ্টিৰ ৰাজ্যিক কাৰ্যনিৰ্বাহক সদস্য ৰঞ্জিত বৰুৱা, নামৰূপ প্ৰেছ ছচাইটি, স্বৰগম কলা নিকেতন, নামৰূপ সৰনাগুৰি বৰনামঘৰপৰিচালনা সমিতিকে ধৰি বিভিন্ন সংগঠন তথা অনুষ্ঠান-প্ৰতিষ্ঠানে ৰাজখোৱাৰ মৃত্যুত শোক প্ৰকাশ কৰাৰ লগতে তেওঁৰ বিদেহী আত্মাৰ সদ্গতি কামনা কৰে।

ৰাজখোৱাই মৃত্যুৰ সময়ত তেওঁৰ পত্নী, এগৰাকী পুত্ৰ আৰু এগৰাকী কন্যাক এৰি থৈ গৈছে।