য়েছে দৰজে ঠংচি, সনন্ত তাঁতি আৰু ড০ ৰীতা চোধুৰীক অসম উপত্যকা সাহিত্য বঁটা প্ৰদান

অসমীয়া সাহিত্য ক্ষেত্ৰলৈ আগবঢ়োৱা উল্লেখনীয় বৰঙনিৰ বাবে বিশিষ্ট সাহিত্যিক ক্ৰমে য়েছে দৰজে ঠংচি, সনন্ত তাঁতি আৰু ড০ ৰীতা চোধুৰীক ২০১৭ বৰ্ষৰ অসম উপত্যকা সাহিত্য বঁটা প্ৰদান কৰা হয়।

কালি মহানগৰীৰ মাছখোৱাস্থিত প্ৰাগজ্যোতি সাংস্কৃতিক প্ৰকল্পত অনুষ্ঠিত এক গাম্ভীৰ্যপূৰ্ণ অনুষ্ঠানত উলিয়ামছন মেগৰ শৈক্ষিক ন্যাসৰ তৰফৰ পৰা প্ৰদান কৰা উক্ত বঁটাত আছে এটা ম্মাৰক, এখন মানপত্ৰ আৰু চাৰি লাখ টকা।

অনুষ্ঠানটোৰ আৰম্ভণিতে তিনিওগৰাকী সাহিতিক্যক ফুলৰ থোপা আৰু এৰী চাদৰেৰে আদৰণি জনোৱা হয়।

বঁটা গ্ৰহণ কৰি বিশিষ্ট কবি সনন্ত তাঁতিয়ে তেওঁৰ কবিতাক হৃদয়ৰ বহিপ্ৰকাশ বুলি উল্লেখ কৰি কয়, ‘জীৱন আৰু জগত সম্পৰ্কে বিশেষ ধ্যান-ধাৰণা নথকা মই এগৰাকী আংবাং ব্যক্তি। মই ৰাজনীতি বুজি নাপাওঁ, বুজি নাপাওঁ জীৱন পৰিচালনাৰ শৈলী আৰু কৌশল। আনকি সময়ৰ সৈতেও আপোচ কৰিব নাজানো। পাঠকে মোৰ হৃদয়ৰ বহিঃপ্ৰকাশক কবিতা বুলি কয় আৰু মোক কবি হিচাপে অভিহিত কৰে। মই অৱশ্যেই ইয়াৰ বাবে গৰ্ববোধ কৰোঁ।‘

একেদৰে ড০ ৰীতা চৌধুৰীয়ে ন্যাসৰ লগতে পাঠক সমাজক ধন্যবাদ জ্ঞাপন কৰি কয়, ‘কলমটোৱে আটাইতকৈ ডাঙৰ আহিলা যাৰ জৰিয়তে মানুহে নিৰ্ভয়ে, স্বাধীনভাৱে সকলো কাম কৰিব পাৰে। কলমটোৰ ক্ষেত্ৰত মই কেতিয়াও আপোচ কৰা নাই।‘

তেওঁ আৰু কয়, ‘পুৰস্কাৰে মানুহক কাম কৰি থাকিবলৈ উৎসাহ দিয়ে। বঁটা-বাহন হৈছে কাম কৰি যোৱা বাটত ছাঁৰ দৰে।‘

ইয়াৰ উপৰি অৰুণাচলৰ বিশিষ্ট সাহিত্যিক য়েছে দৰজে ঠংচিয়ে বঁটা গ্ৰহণ কৰি উলিয়ামছন মেগৰ শৈক্ষিক ন্যাসক ধন্যবাদ জ্ঞাপন কৰে।

ন্যাসৰ সঞ্চালক আৰ এছ জ্বৱাৰে আদৰণী ভাষণ প্ৰদান কৰা অনুষ্ঠানটোত মুখ্য অতিথি হিচাপে উপস্থিত থকা বিশিষ্ট সাহিত্যিক-সমালোচক জি এন ডেভীয়ে বঁটাপ্ৰাপক তিনিওগৰাকী সাহিত্যিকক অভিনন্দন জ্ঞাপন কৰে।

অনুষ্ঠানটোত অসমীয়া সাহিত্য জগতৰ বহু কেইগৰাকী বিশিষ্ট ব্যক্তি উপস্থিত আছিল।