১৭জন লোকৰ প্ৰাণ লোৱা ‘লাডেন’ৰ কাইলৈ নিৰ্ণয় হ’ব ভাগ্য : পৰিৱেশ আৰু বন বিভাগৰ গুৰুত্বপূৰ্ণ বৈঠক

গোৱালপাৰা অঞ্চলত আজি বহু দিন ধৰি ত্ৰাসৰ সৃষ্টি কৰি অহাৰ লগতে এতিয়ালৈকে ১৭জন লোকৰ প্ৰাণ লোৱা কুখ্যাত ‘লাডেন’ এতিয়া হৈ পৰিছে চৰ্চাৰ কেন্দ্ৰবিন্দু। সন্ত্ৰাসৰ বাবে ‘লাডেন’ নামেৰে স্থানীয়ভাৱে আখ্যা পোৱা এই হাতীটোক লৈ এতিয়া চিন্তিত হৈ পৰিছে বন বিভাগ আৰু বন্যপ্ৰাণী সংৰক্ষণ বিভাগো।

মন কৰিব লগীয়া যে যোৱা কেইদিনমানৰ ভিতৰতে ‘লাডেন’-এ গোৱালপাৰাৰ দুধনৈ আদি অঞ্চলত কেইবাজনো লোকৰ প্ৰাণ লৈছে। বন বিভাগৰ তথ্যমতে এই মখনা (দীঘল দাঁত নথকা) হাতীটোৰ উচ্চতা প্ৰায় ৯ ফুট।

মানুহৰ ওপৰত বনৰীয়া হাতীটোৰ এই ক্ৰমবৰ্ধিত আক্ৰমণক লৈ চিন্তিত হৈ পৰা ৰাজ্যৰ বন বিভাগ আৰু বন্যপ্ৰাণী সংৰক্ষণ বিভাগে কাইলৈ আহ্বান জনাইছে এখন গুৰুত্বপূ্ৰ্ণ বৈঠকৰ। পাঞ্জাবাৰীস্থিত প্ৰধান মুখ্য বন সংৰক্ষক (বন্যপ্ৰাণী)দেবপ্ৰকাশ বাংকুৱালৰ কাৰ্য্যালয়ত এই বৈঠকখন অনুষ্ঠিত হ’ব। ইয়াত গোৱালাপাৰাৰ কিছু কিছু অংশত সৃষ্ট মানুহ-হাতীৰ সংঘাতৰ কেনেকৈ নিৰাময় কৰিব পাৰি তাৰ উপায় উলিওৱাৰ চেষ্টা কৰা হ’ব বুলি জানিব পৰা গৈছে।

বিভাগটোৰ সূত্ৰই জনোৱা মতে যোৱা ২১ জুনত বন বিভাগৰ গুৱাহাটীৰ পৰা যোৱা দুজন মান প্ৰতিনিধিয়ে গোৱালপাৰাৰ হাতী-মানুহৰ সংঘাত হোৱা আৰু তাৰ ফলত মানুহৰ মৃত্যু হোৱা স্থানবোৰ পৰিদৰ্শন কৰিছিল। তাৰ পাছতে এই গুৰুতৰ ৰূপ লোৱা পৰিস্থিতি সন্দৰ্ভত এই বৈঠকৰ সিদ্ধান্ত কৰিছে বিভাগটোৱে।

মন কৰিব লগীয়া যে হাতী-মানুহৰ সংঘাত বৃদ্ধিৰ আঁৰত বনাঞ্চল ধ্বংস, হাবিত হাতীৰ খাদ্যৰ অভাৱ, মানুহৰ কৃষিৰ পৰিসৰ নতুন নতুন অংশলৈ বৃদ্ধি আদিও আছে। আনহাতে স্থানীয় লোকৰ সূত্ৰই কয় যে লাডেন নামৰ এটা হাতীৰ সন্ত্ৰাস বাকীবোৰতকৈ বেছি যদিও আন হাতীয়ে মানুহ মাৰিলেও মানুহে লাডেনেই মৰা বুলি প্ৰচাৰ কৰি দিয়ে।