২৭ মাৰ্চৰ পৰা ৩০ মাৰ্চলৈ লখিমপুৰত ৰাজ্যিক যুৱ সমাৰোহ

‘ৰাজ্যত বৃদ্ধি পোৱা নিবনুৱা সমস্যাৰ মূল কাৰণ হৈছে প্ৰচলিত শিক্ষা ব্যৱস্থা। বৰ্তমানৰ শিক্ষা ব্যৱস্থাই মানৱ সম্পদ সৃষ্টি কৰিছে যদিও সেই সম্পদ ক’ত কেনেদৰে ব্যৱহাৰ কৰিব সেই সম্পৰ্কত ৰাজ্য চৰকাৰৰ হাতত কোনো নিৰ্দিষ্ট পৰিকল্পনা নাই। আৰু ইয়াৰ বাবে অসমত নিবনুৱা সমস্যাই ভয়াৱহ ৰূপ লৈছে’।

দেওবাৰে নৰ্থ লখিমপুৰ প্ৰেছ ক্লাবত সদৌ অসম নিবনুৱা সন্থা আৰু ৰাজ্যিক যুৱ সমাৰোহ উদ্‌যাপন সমিতিয়ে আয়োজন কৰা এখন সংবাদমেলত সন্থাৰ কেন্দ্ৰীয় সমিতিৰ সভাপতি নীলমণি হাজৰিকাই এই গুৰুতৰ অভিযোগ উত্থাপন কৰে।

উল্লেখ্য যে ২৭ মাৰ্চৰ পৰা ৩০ মাৰ্চলৈ লখিমপুৰত অনুষ্ঠিত হ’বলগীয়া ৰাজ্যিক যুৱ সমাৰোহৰ প্ৰস্তুতি সন্দৰ্ভত সন্থাৰ কেন্দ্ৰীয় সমিতিয়ে সংবাদমেলযোগে প্ৰচাৰ কৰিবলৈ আহি ৰাজ্য চৰকাৰে নিবনুৱা সমস্যা সমাধানৰ ক্ষেত্ৰত বিফল হোৱা কাৰ্যক তীব্ৰ সমালোচনা কৰে। ইয়াৰ উপৰি সন্থাই নিৰ্বাচনী প্ৰতিশ্ৰুতি অনুসৰি পদক্ষেপ ল’বলৈ দাবী জনোৱাৰ লগতে পতিত ভূমি নিবনুৱাক কৃষিকাৰ্যৰ বাবে আবণ্টণ দিবলৈ আহ্বান জনায়।

আনহাতে ৰাজ্যিক যুৱ সমাৰোহৰ প্ৰস্তুতি সম্পৰ্কে কয় যে সাম্প্ৰতিক অসমৰ বাস্তৱ পটভূমিত নিবনুৱা সমস্যা এক ভয়াবহ সমস্যা। এই সমস্যাৰ এক বিকল্প পথৰ সন্ধান কৰাৰ লক্ষ্যৰে সদৌ অসম নিবনুৱা সন্থাৰ উদ্যোগত অহা ২৭ মাৰ্চৰ পৰা ৩০ মাৰ্চলৈ লখিমপুৰত ৰাজ্যিক ভিত্তিত এই যুৱ সমাৰোহ অনুষ্ঠিত কৰিবলৈ সিদ্ধান্ত গ্ৰহণ কৰা হৈছে।

এই যুৱ সমাৰোহৰ লগত সংগতি ৰাখি আলোচনা-চক্ৰ, চিত্ৰাংকণ, ৰচনা প্ৰতিযোগিতা, সদৌ অসম ভিত্তিত তৰ্ক প্ৰতিযোগিতা আদি অনুষ্ঠিত কৰাৰ কথাও সদৰী কৰে। উল্লেখ্য যে প্ৰায়  ১৫ লাখ টকাৰ বাজেটেৰে আয়োজন কৰা এই যুৱ সমাৰোহত সমগ্ৰ অসমৰ ২৫ খন জিলাৰ প্ৰায় এহাজাৰ প্ৰতিনিধিয়ে অংশগ্ৰহণ কৰিব বুলিও সদৰী কৰে।

সমাৰোহৰ আয়োজক সমিতিয়ে সংবাদমেলৰ জৰিয়তে অসমৰ মুখ্যমন্ত্ৰী সৰ্বানন্দ সোণোৱালক সমাৰোহৰ মুকলি সভাত অংশগ্ৰহণ কৰি ভয়াবহ নিবনুৱা সমস্যা অনুধাৱন কৰিবলৈও আহ্বান জনায়।

উল্লেখ্যযোগ্য যে সমাৰোহৰ লগত সংগতি ৰাখি ছাত্ৰ-ছাত্ৰীৰ মাজত ‘নিবনুৱা সমস্যাৰ ভয়াৱহতা’ শীৰ্ষক বিষয়ত চিত্ৰাংকণ প্ৰতিযোগিতা, ‘নিবনুৱা সমস্যা আৰু ইয়াৰ বাস্তৱসন্মত সমাধান’ শীৰ্ষক বিষয়ত আলোচনা-চক্ৰ অনুষ্ঠিত হ’ব।

আনহাতে ২৯ মাৰ্চত ‘প্ৰচলিত শিক্ষা ব্যৱস্থাই নিবনুৱা সমস্যাৰ মূল কাৰণ’ শীৰ্ষক বিষয়ত তৰ্ক প্ৰতিযোগিতা, আৰু ‘সাম্প্ৰতিক অসমত নিবনুৱা সংস্থাপনৰ সুযোগ আৰু সম্ভাৱনা’ শীৰ্ষক বিষয়ত এখন আলোচনা-চক্ৰ অনুষ্ঠিত হ’ব।

পতাকা উত্তোলন কাৰ্যসূচীৰে শুভাৰম্ভ কৰিবলগীয়া সমাৰোহৰ অন্তিম দিনা পুৱা স্মৃতিগ্ৰন্থ উন্মোচন আৰু মুকলি সভাৰ কাৰ্যসূচীৰ মাজেৰে সমাৰোহৰ সামৰণি পৰিব।