ৰকিবুল হুছেইনৰ বিৰুদ্ধে কৃষক শ্ৰমিক উন্নয়ন পৰিষদৰ সভাপতি প্ৰদীপ কলিতাৰ গোচৰ

দুৰ্নীতি তথা অপৰাধৰ অভিযোগে যেন লগ এৰা নাই প্ৰাক্তন মন্ত্ৰী ৰকিবুল হুছেইনৰ। আজি পুনৰ দিচপুৰ থানাত কৃষক শ্ৰমিক উন্নয়ন পৰিষদৰ সভাপতি প্ৰদীপ কলিতাই প্ৰাক্তন কংগ্ৰেছী মন্ত্ৰীগৰাকীৰ বিৰুদ্ধে এক গোচৰ ৰুজু কৰে।

প্ৰদীপ কলিতাই কৰা অভিযোগ অনুসৰি ‘ৰকিবুল হুছেইনৰ নগাঁৱৰ বাসভবনৰ ঠিকনা দি বাংলাদেশী দুধৰ্ষ উগ্ৰপন্থী নেতা মুক্তাৰ আলীয়ে উগ্ৰপন্থী দলত যুৱকসকলক ভৰ্তি কৰাই মেঘালয়ৰ বৰ্ণিহাটত প্ৰশিক্ষণ দিছিল।  চিঠিখনত সমগ্ৰ কথাখিনি স্পষ্ট ৰূপত উল্লেখ আছে।‘

তদুপৰি তেওঁ নৰ্থ ইষ্ট নাওৰ আগত কয় কয় যে ২০০৬ চনত মেঘালয় আৰু অসম দুয়োখনতে কংগ্ৰেছ চৰকাৰ আছিল। সেই সময়তে মেঘালয়ৰ বৰ্ণিহাটত উগ্ৰপন্থী দলে কেম্প কৰি থকা ঘটনাটো ডেকি চেইম নামৰ এগৰাকী গাওঁবুঢ়াই গম পাইছিল আৰু তেতিয়াই তেওঁ চীল-মোহৰ মাৰি এখন চিঠি লিখি মেঘালয় চৰকাৰৰ মুখ্য সচিব তথা কেন্দ্ৰীয় চৰকাৰলৈ প্ৰেৰণ কৰিছিল।

তাৎপৰ্য্যপূৰ্ণ কথা যে সেই সময়ত অসম চৰকাৰৰ প্ৰভাৱশালী মন্ত্ৰী ৰকিবুল হুছেইনৰ নাম চিঠিখনৰ সৈতে সাঙোৰ খাই থকাৰ বাবে কেন্দ্ৰীয় চৰকাৰ তথা মেঘালয় চৰকাৰে কোনোধৰণৰ তদন্ত নকৰা বুলি কলিতাই এক গুৰুতৰ অভিযোগ তোলে।

তেওঁ লগতে কয়, ‘সমগ্ৰ ঘটনাৰ ব্লু-প্ৰিন্ট ৰচনা ৰকিবুল হুছেইনৰ নেতৃত্বত হৈছিল। শিল, বালি, কয়লা, গঁড়ৰ খৰ্গৰ চিণ্ডকেট চলাই সেই ধনখিনি উগ্ৰপন্থী দলৰ প্ৰশিক্ষণৰ বাবদ খৰচ কৰিছিল। এই চিণ্ডিকেটৰাজো সংঘটিত কৰিছিল মোক্তাৰ আলীয়ে। তেওঁক ৰক্ষণাবেক্ষণ দিছিল প্ৰাক্তন মন্ত্ৰী ৰকিবুল হুছেইনে।‘

আনহাতে, সভাপতিগৰাকীয়ে মেঘালয় চৰকাৰকো এই ঘটনাৰ সৈতে জড়িত থকা বুলি মন্তব্য কৰি কয়, ‘গাওঁবুঢ়াই প্ৰদান কৰা চিঠিখন মেঘালয় চৰকাৰৰ মুখ্য সচিবে লাভ কৰাৰ পিছতো বিষয়টোৰ সন্দৰ্ভত তদন্ত ঘোষণা নকৰিলে। লগতে প্ৰভাৱশালী লোকসকল আইনৰ আওতালৈ আহিবলগীয়া হোৱাৰ ভয়ত সমগ্ৰ বিষয়টো গাপ দি ৰাখিলে।‘

মুক্তাৰ আলী সম্পৰ্কত তেওঁ নৰ্থ ইষ্ট নাওক জনাই যে মুক্তাব আলী পাকিস্তানৰ হোৱাৰ পিছতো তেওঁ বাংলাদেশৰ নাগৰিকত্ব গ্ৰহণ কৰিছিল। বাংলাদেশৰ নাগৰিক হৈ ৰকিবুল হুছেইনৰ গৃহৰ ঠিকনাটো তেওঁ কেনেকৈ অবগত হ’ব? গতিকে আমি এটা কথাই জানিব পাৰিছো যে তেওঁৰ নিশ্চয়কৈ মুক্তাৰ আলীৰ সৈতে সম্পৰ্ক আছে।‘

তেওঁ নৰ্থ ইষ্ট নাওক জনোৱা অনুসৰি দিছপুৰ থানাত ১৯৫৯/১৮ নম্বৰত এক গোচৰ ৰুজু কৰে। এই গোচৰটো দিছপুৰ থানাই খানাপাৰা থানালৈ প্ৰেৰণ কৰিব।

তেওঁ লগতে অসম চৰকাৰক এই বিষয়টো গুৰুত্বসহকাৰে লৈ তদন্ত কৰিবৰ বাবে আহ্বান জনায়। তদুপৰি যদি অসম চৰকাৰে এই বিষয়টো গুৰুত্ব আৰোপ নকৰে তেন্তে উচ্চ ন্যায়ালয়ৰ কাষ চাপিব বুলি সদৰী কৰে।

আনহাতে, কৃষক শ্ৰমিক পৰিষদৰ সভাপতি প্ৰদীপ কলিতাক গোচৰ ৰুজু কৰাৰ ক্ষেত্ৰত গৰীয়া মৰীয়া যুব ছাত্ৰ পৰিষদেও সহায়-সহযোগিতা আগবঢ়াইছে।

গৰীয়া মৰীয়া যুৱ ছাত্ৰ পৰিষদৰ সভাপতি মইনুল হকে কৰা অভিযোগ অনুসৰি ‘মেঘালয়ৰ গাওঁবুঢ়াগৰাকীয়ে প্ৰদান কৰা চিঠিৰ ওপৰত ভিত্তি কৰি অসমৰ এগৰাকী জিলা আৰক্ষী অধীক্ষক শংকৰ প্ৰসাদ নাথে সেই সময়ত তদন্ত প্ৰক্ৰিয়া আৰম্ভ কৰিছিল। তদন্ত কৰি থকা থকাৰ সময়ত জিলা আৰক্ষী অধীক্ষক গৰাকীক মৃত্যুৰ ভাবুকি দিয়া বুলি লিখিত অভিযোগ দিছিল। কিছুদিন পিছতে তেওঁৰ ৰহস্যজনকভাবে দুৰ্ঘটনাত পতিত হৈ মৃত্যুক সাবটি লয়। ইয়াক আমি পৰিকল্পিত হত্যাকাণ্ড বুলি ক’ব খোজো। দুৰ্ঘটনা সংঘটিত হোৱাৰ পিছত গুৱাহাটী ট্ৰেফিক আৰক্ষীয়ে দিয়া তথ্য অনুসৰি তেওঁক ডাউন টাউন হাস্পতাললৈ নিয়া হৈছিল। কিন্তু ডাউন টাউন হাস্পতালত তেওঁক ভৰ্ত্তি কৰোৱাৰ কোনো তথ্য নাই। গতিকে ইয়াৰ পৰা এইটোৱেই প্ৰমাণ হৈছে যে শংকৰ প্ৰসাদ নাথৰ হত্যাৰ সৈতে ৰকিবুল হুছেইনৰ গুণ্ডাবাহিনী জৰিত হৈ আছে।‘

তাৎপৰ্য্যপূৰ্ণভাৱে মইনুলে প্ৰাক্তন মুখ্য মন্ত্ৰী তৰুণ গগৈয়ে যিদৰে হিমন্ত বিশ্ব শৰ্মাক দুৰ্নীতি কৰাৰ পিছতো ছাঁ দি ৰাখিছিল তেনেকৈয়ে ৰকিবুলকো সুৰক্ষা দিয়া বুলি সন্দেহ প্ৰকাশ কৰে।

কৃষক শ্ৰমিক উন্নয়ন পৰিষদৰ সভাপতি প্ৰদীপ কলিতাই প্ৰাক্তন মন্ত্ৰী ৰকিবুল হুছেইন, মেঘালয়ৰ নংপহ জিলাৰ ৰাজহ বিষয়া এন. এ. কে চেইম,  দিল্লী পাব্লিক স্কুলৰ স্বত্বাধিকাৰী  ৰাম অবতাৰ সিং, অধিবক্তা এছ পি ৰয়, আৰক্ষী বিষয়া বীৰেণ বৰা, উগ্ৰপন্থী নেতা মুক্তাৰ আলী, শ্বিলঙৰ অধিবক্তা এইচ. এছ. থাঙখিউ আৰু মেঘালয়ৰ কেন চেইমৰ বিৰুদ্ধেও দিচপুৰ থানাত গোচৰ ৰুজু কৰে।