ৰাকেশ পালৰ আয়ৰ সৈতে সামঞ্জস্যহীন সম্পত্তিৰ তদন্ত আৰম্ভ চি বি আইৰ

এপিএছচি কেলেংকাৰীৰ মূল অভিযুক্ত ৰাকেশ পালৰ আয়ৰ সৈতে সামঞ্জস্যহীন সম্পত্তিৰ অভিযোগৰ সম্পৰ্কত তদন্তকাৰী সংস্থা চিবিআইয়ে প্ৰাথমিক তদন্ত আৰম্ভ কৰিছে।

বিভিন্ন পৰ্যায়ৰ প্ৰশাসনীয় বিষয়া বাছনিৰ নামত ব্যাপক কেলেংকাৰী সংঘটিত কৰা আৰু অগাধ ধন-সম্পত্তিৰ অধিকাৰী হৈ পৰা অসম লোকসেৱা আয়োগৰ নিলম্বিত অধ্যক্ষ ৰাকেশ পালৰ বিৰুদ্ধে চি বি আইয়ে আনুষ্ঠানিকভাৱে তদন্ত আৰম্ভ কৰিছে।

সংস্থাটোৱে বৰ্তমান কাৰাবন্দী হৈ থকা পালক এই সম্পৰ্কত জেৰা কৰাৰ বাবে প্ৰস্তুতি চলাইছে।

ৰাকেশ পালৰ সন্দৰ্ভত চিবিআই তদন্ত ঘোষণা কৰা গুৱাহাটী উচ্চ ন্যায়ালয়ৰ ৰায়টোকে উচ্চতম ন্যায়ালয়েও বাহাল ৰখাৰ পিছত তদন্তকাৰী সংস্থাটোৱে প্ৰাৰম্ভিক অভিযোগ পঞ্জীয়ন কৰি আৰম্ভ কৰা অনুসন্ধানৰ অংশ হিচাপে চিবিআইৰ গুৱাহাটী শাখাই পালৰ সম্পৰ্কত তথ্য পাতি সংগ্ৰহ কৰিছে।

এপিএছচি কেলেংকাৰী সম্পৰ্কত ডিব্ৰুগড় আৰক্ষীয়ে চলোৱা তদন্তত উদ্ধাৰ হোৱা তথ্য প্ৰমানসমূহ চিবিআইৰ এগৰাকী উপ আৰক্ষী অধীক্ষকৰ নেতৃত্বত গঠিত তিনিজনীয়া দলে সংগ্ৰহ কৰিছে।

ডিব্ৰুগড়ৰ গোচৰটোৰ তদন্তকাৰী বিষয়া তথা অতিৰিক্ত আৰক্ষী অধীক্ষক সুৰজিৎ সিং পানেছাৰৰ সৈতে এই বিষয়ত যোৱা দুদিন লগ ধৰি চিবিআইৰ দলটোৱে দীঘলীয়া আলোচনাত মিলিত হয়।

চিবিআইয়ে বিষয়াজনৰ পৰা গোচৰটোৰ আটাইবোৰ অভিযোগনামাৰ প্ৰতিলিপি, জব্দ কৰা সামগ্ৰীৰ তালিকাৰ প্ৰতিলিপি, তদন্তত লাভ কৰা পালৰ সা-সম্পত্তিৰ তথ্য, পালৰ বেংক লেন-দেনৰ তথ্যকে ধৰি সকলো নথি পত্ৰ সংগ্ৰহ কৰে।

উল্লেখযোগ্য যে পালৰ সন্দৰ্ভত কৃষক নেতা অখিল গগৈয়ে চিবিআই তদন্ত বিচাৰি দাখিল কৰা এখন জনস্বাৰ্থ জড়িত আবেদনৰ বিচাৰ কৰি গুৱাহাটী উচ্চ ন্যায়ালয়ে পালৰ সন্দৰ্ভত চিবিআই তদন্তৰ নিৰ্দেশ দি ৰায়দান কৰিছিল। পিছত পালে এই ৰায়ক উচ্চতম ন্যায়ালয়ত প্ৰত্যাহ্বান জনাইছিল যদিও উচ্চতম ন্যায়ালয়ে গুৱাহাটী উচ্চ ন্যায়ালয়ৰ ৰায়কে বাহাল ৰাখে।