ৰাজ্যৰ চাকিৰমুখী নিবনুৱা প্ৰাৰ্থীলৈ সু-খবৰ : আবেদনকাৰীৰ বয়সৰ ঊৰ্ধ্বসীমা ৪৪ বছৰলৈ বৃদ্ধি

সোমবাৰে হিমন্ত বিশ্ব শৰ্মাই সংবাদমেলৰ জৰিয়তে কৰা এক ঘোষণাই ৰাজ্যবাসীৰ নিবনুৱা যুৱক সকললৈ কঢ়িয়াই আনে এক সু-খবৰ।

সংবাদমেলৰ জৰিয়তে হিমন্ত বিশ্ব শৰ্মাই ঘোষণা কৰা অনুসৰি চৰকাৰী চাকৰিৰ আবেদনকাৰী সকলৰ বয়সৰ ঊৰ্ধ্বসীমা পূৰ্বৰ ৩৮ বছৰৰ সলনি ৪৪ বছৰলৈ বৃদ্ধি কৰে।

আনহাতে সংবামেলতে হিমন্ত বিশ্ব শৰ্মাই কয় যে এতিয়াৰে পৰা তৃতীয় আৰু চতুৰ্থবৰ্গৰ চাকৰিৰ বাবে কোনো ধৰণৰ মাচুল আদায় দিব নালাগে। বিত্ত বিভাগে এই ক্ষেত্ৰত প্ৰয়োজনীয় অধিসূচনা জাৰি কৰিছে।

বিত্ত মন্ত্ৰী গৰাকীয়ে কয় যে, ‘তৃতীয় আৰু চতুৰ্থবৰ্গৰ পদৰ বাবে মাচুল ৰেহাইৰ ব্যৱস্থা থাকিলেও অসম লোকসেৱা আয়োগে অনুষ্ঠিত কৰা গ্ৰেড ৱান আৰু টু পদৰ বাবে মাচুল আদায় দিব লাগিব। অৱশ্যে পূৰ্বৰ তুলনাত এই মাচুল যথেষ্ট হ্ৰাস কৰাৰ বাবে আবেদনকাৰীয়ে ২৫০ টকা মাচুল আদায় দিলেই হ’ব। ইয়াৰ বিপৰীতে অনুসূচিত জাতি-জনজাতি আৰু অন্যান্য পিছপৰা শ্ৰেণীৰ প্ৰাৰ্থীয়ে ১৫০ টকা মাচুল দিলেই হ’ব।’

তাৰোপৰি হাইস্কুলসমূহত কৰ্মৰত ঠিকাভিত্তিক শিক্ষকসকলৰ দৰমহা ১৫ হেজাৰ টকাৰপৰা ২০ হেজাৰ টকালৈ বৃদ্ধিৰ বাবেও অনুমোদন দিয়া হৈছে বুলি মন্ত্ৰী গৰাকীয়ে সংবাদমেলত ঘোষণা কৰে।

লগতে চৰকাৰী ছ’চাইটীসমূহত কৰ্মৰত কৰ্মচাৰীসকলৰ আকস্মিক মৃত্যুত পৰিয়ালক ৫ লাখ টকা ক্ষতিপূৰণ দিয়াৰ ব্যৱস্থাও আৰম্ভ হৈছে বুলিও বিত্ত মন্ত্ৰী ড০ হিমন্ত বিশ্ব শৰ্মাই কয়।