ৰাষ্ট্ৰসংঘত ভাষণ আগবঢ়াব যোৰহাটৰ পৰিৱেশ কৰ্মী সুমন্ত কৌশিক শৰ্মাই

ৰাষ্ট্ৰসংঘত পুনৰনৱীকৰণ শক্তিৰ ৱ্যৱহাৰ সন্দৰ্ভত অনুষ্ঠিতব্য কৰ্মশালাত ভাষণ আগবঢ়াবলৈ আমন্ত্ৰিত হৈ অসমলৈ গৌৰৱ কঢ়িয়াই আনিবলৈ সক্ষম হৈছে যোৰহাটৰ পৰিৱেশ কৰ্মী সুমন্ত কৌশিক শৰ্মাই।

সম্প্ৰতি উত্তৰাখণ্ড চৰকাৰৰ অধীনত ৰাজহুৱা ব্যক্তিগত সহযোগিতামূলক বিশেষজ্ঞ ৰূপে কৰ্মৰত শৰ্মাই ৰাষ্ট্ৰসংঘত ‘প্ৰম’টিং কমিউনিটি ছাছটেইনিবিলিটি থ্ৰ’ ক্লীন এনাৰ্জী ইন ৰুৰেল নৰ্থ ইষ্ট ইণ্ডিয়াঃ ইন’ভেটিভ ফাইনাঞ্চিং’ বিষয় সন্দৰ্ভত নিজৰ ভাষণ আগবঢ়াব।

উল্লেখ্য যে টেম্পলৰ আৰিজোনা ষ্টেট ইউনিভাৰ্চিটিত ফেব্ৰুৱৰীৰ ১২ৰ পৰা ১৪ তাৰিখলৈ অনুষ্ঠিত হ’বলগীয়া এই তিনিদিনীয়া কৰ্মশালাখনৰ আয়োজন কৰিছে স্কুল ফৰ ফিউচাৰ অৱ ইনোভেচন ইন ছ’চাইটিয়ে।

প্ৰসংগক্ৰমে উল্লেখযোগ্য যে আন্তঃৰাষ্টীয় পৰ্যায়ৰ কৰ্মশালাখনত ভাৰতক প্ৰতিনিধিত্ব কৰাৰ সুযোগ পোৱা  শৰ্মাই হৈছে একমাত্ৰ ভাৰতীয়।

শক্তি সংৰক্ষণৰ বাবে কিদৰে  নতুন পদক্ষেপ গ্ৰহণ কৰিব পৰা যায় সেই সন্দৰ্ভত কৰ্মশালাখনত উপস্থিত থকা বিশ্বৰ ভিন্ন প্ৰান্তৰ বক্তাসকলে নিজৰ নিজৰ মত ব্যক্ত কৰিব।

আনহতে গোলকীয় দৰিদ্ৰতা নিৰ্মূল আৰু সমগ্ৰ মানৱজাতিক পুনৰনৱীকৰণ শক্তি যোগানৰ ৰাষ্টসংঘৰ যি উন্নয়নমূলক লক্ষ্য নিৰ্ধাৰণ কৰা হৈছে সেই সন্দৰ্ভতো কৰ্মশালাখনত আলোচনা কৰা হ’ব।

উল্লেখ্য যে অংশগ্ৰহণকাৰী সকলে পূৰ্বে দাখিল কৰা তথ্যৰ ওপৰত ভিত্তি কৰি গোলকীয় স্তৰত সম্পূৰ্ণ যোগ্যতা অৰ্জনকাৰীসকলক কৰ্মশালাখনৰ বাবে আমন্ত্ৰণ জনোৱা হৈছে।

যোৰহাটৰ ফুকন আলিৰ পৰা ৰাষ্ট্ৰসংঘৰ মজিয়ালৈ সুমন্ত কৌশিক শৰ্মাৰ যাত্ৰা আদৰণীয়।