বিশাখাপট্টনমৰ বন্দৰত অঘটন: শ্ৰমিকৰ ওপৰত ভাগি পৰিল বিশাল ক্ৰেণ,দহ জন নিহত

মাত্ৰ কিছুদিন পূৰ্বে ভয়ংকৰ গেছ দুৰ্ঘটনাই জোকাৰি যোৱা অন্ধ্ৰ প্ৰদেশৰ বিশাখাপট্টনমত আজি পুনৰ সংঘটিত হ’ল এক ভয়ংকৰ দুৰ্ঘটনা।

বন্দৰ নগৰী হিচাবে খ্যাত বিশাখাপট্টনমৰ হিন্দুস্তান শ্বিপিং য়াৰ্ডত আজি বিয়লি এখন বিশাল ক্ৰেণ শ্ৰমিকৰ ওপৰত খহি পৰাৰ ফলত ১০ জন শ্ৰমিকৰ থিতাতে মৃত্যু ঘটে।

বিশাখাপট্টনমৰ বন্দৰত থকা ভাৰত চৰকাৰৰ অধীনস্থ প্ৰতিষ্ঠানটোত শ্ৰমিক সকলে গধুৰ বস্তু দঙাৰ বাবে এটা কেইবাটনো ওজনৰ ক্ৰেণ সাজু কৰি থকাৰ সময়তে প্ৰচণ্ড শব্দ কৰি ক্ৰেণ খন তললৈ ভাঙি পৰে ।

ফলত বহু কেইজন শ্ৰমিকক ক্ৰেণ খনে হেঁচা মাৰি ধৰে।

এতিয়ালৈকে দহ জন শ্ৰমিকৰ মৃতদেহ উদ্ধাৰ কৰিব পৰা গৈছে বুলি বিশাখাপট্টনমৰ আৰক্ষী আয়ুক্ত আৰ কে মীনাই প্ৰকাশ কৰিছে।

দুৰ্ঘটনাটো সংঘটিত হোৱাৰ সময়ত তাত কমেও ২০ জন শ্ৰমিকে কাম কৰি আছিল যদিও বহু কেইজন শ্ৰমিকে কথমপি প্ৰাণ ৰক্ষা কৰিবলৈ সক্ষম হয়।

অন্ধ্ৰ প্ৰদেশৰ পৰ্যটন দপ্তৰৰ মন্ত্ৰী মুথাম ছেট্টি ৰাওৱে ঘটনাস্থলীত উপস্থিত হৈ পৰিস্থিতিৰ বুজ লয়।

তেওঁ নিহত শ্ৰমিক কেইজনৰ পৰিয়ালক উপযুক্ত সাহায্য প্ৰাদান কৰা হ’ব বুলি ঘোষণা কৰে।

জানিব পৰা মতে ভাৰত চৰকাৰৰ অধীনস্থ হিন্দুস্তান শ্বিপয়াৰ্ড লিমিটেডে প্ৰায় দহ বছৰ পূৰ্বে উক্ত ক্ৰেণ খন কিনিছিল।

ক্ৰেণ খনৰ মেৰামতিৰ প্ৰয়োজন আছিল যদিও কৰা হোৱা নাছিল।