ভাৰতীয় নাগৰিকত্ব প্ৰমান কৰিবলৈ সংগ্ৰাম কৰি অৱশেষত মৃত্যুক সাৱটিলে অসমৰ ১০৪বছৰীয়া বৃদ্ধই

দুবছৰতকৈয়ো অধিক সময় নিজৰ ভাৰতীয় নাগৰিকত্ব প্ৰমান কৰিবলৈ সংগ্ৰাম কৰি থকা অসমৰ কাছাৰ জিলাৰ ১০৪বছৰীয়া ব্যক্তিগৰাকীৰ মৃত্যু ঘটিল।

বাংলাদেশৰ পৰা অহা এগৰাকী বিদেশী বুলি ঘোষণা হোৱাৰ পাছত ২০১৮চনত আটক হোৱা চন্দ্ৰধৰ দাসৰ দেওবাৰে কাছাৰ জিলাৰ আম্ৰাঘাটৰ বাসভৱনত পৰলোকপ্ৰাপ্তি ঘটে।

দাসৰ কন্যা নিয়তিয়ে কয় যে তেওঁ দীৰ্গদিন ধৰি অসুস্থ আছিল আৰু কেইমাহ ধৰি ভালদৰে খাব পৰা নাছিল।

‘’দেওবাৰে নিশা ১০-৩০ বজাত তেওঁৰ মৃত্যু হয়,’’-নিয়তিয়ে কয়।

শতবৰ্ষীয় ব্যক্তিগৰাকীৰ এটাই মাত্ৰ ইচ্ছা আছিল তেওঁ এগৰাকী ভাৰতীয় নাগৰিক হিচাপে শেষ নিশ্বাস ত্যাগ কৰিব বিচাৰিছিল।

দাসক ২০১৮ৰ জানুৱাৰিত শিলচৰৰ বিদেশী ন্যায়াধীকৰণে এগৰাকী বিদেশী বুলি ঘোষণা কৰিছিল আৰু তাৰপাছতেই শিলচৰ কেন্দ্ৰীয় কাৰাগাৰলৈ প্ৰেৰণ কৰা হৈছিল।

‘’দাসে ন্যায়াধীকৰণৰ আগত উপস্থিত হ’ব নোৱাৰাৰ বাবে এয়া আছিল একপক্ষীয় ৰায়,’’-দাসৰ অধিবক্তা সুমন চৌধুৰীয়ে কয়।

কাৰাগাৰত থকা সময়ত দাসৰ স্বাস্থ্য ভাল নাছিল, দুৰ্বল আছিল আৰু কোনোমতেহে খোজকাঢ়িব পাৰিছিল।

তেওঁৰ স্বাস্থ্যৰ অৱনতি গটিবলৈ আৰম্ভ কৰাৰ পাছত তেওঁক মানৱীয়তাৰ ভিত্তিত তিনিমাহৰ বাবে জামিনত মুকলি কৰি দিয়া হৈছিল।

অধিবক্তা চৌধুৰীয়ে জানিবলৈ দিয়া মতে,  বিদেশী ন্যায়াধীকৰণে পূৰ্বৰ একপক্ষীয়া ৰায়ক একাষৰীয়া কৰি ৰাখি দাসক জামিনত মুকলি দিছিল আৰু গোচৰটো নতুনকৈ পৰীক্ষা কৰিব দিছিল।

অধিবক্তা চৌধুৰীয়ে কয় যে দাসৰ নাগৰিকত্বৰ দাবীৰ ভিত্তি আছিল ১৯৬৬চনত ত্ৰিপুৰাৰ আগৰতলাত লাভ কৰা এখন এগৰাকী শৰণাৰ্থী পঞ্জীয়ন প্ৰমানপত্ৰ য’ত উল্লেখ থকা মতে তেওঁৰ জন্ম হৈছিল পূব পাকিস্তানৰ কুমিল্লাত।

‘’এই নথি ত্ৰিপুৰাৰ কৰ্তৃপক্ষৰ দ্বাৰা পৰীক্ষণ কৰিবলৈ এতিয়াও বাকী আছিল যাৰ বাবে তেওঁৰ গোচৰটো পৰি আছিল,’’- চৌধুৰীৰ উদ্ধৃতিৰে এই কথা প্ৰকাশ কৰিছে ‘ইষ্ট ম’জো’ৱে।

২০১৯ৰ ডিচেম্বৰত সংসদত নাগৰিকত্ব সংশোধনী আইন গৃহীত হোৱাৰ পাছত পৰিয়ালে আশা কৰিছিল যে অৱশেষত দাসে তেওঁৰ ভাৰতীয় নাগৰিকত্ব লাভ কৰিব।

‘’মোৰ দেউতাৰ একমাত্ৰ ইচ্ছা আছিল যে তেওঁ এগৰাকী ভাৰতীয় হিচাপে মৰিবলৈ বিচাৰিছিল। কিন্তু সেয়া হৈ নুঠিল। দেওবাৰে নিশা আম্ৰাঘাটৰ আমাৰ ঘৰত তেওঁৰ মৃত্যু হয়,’’-কন্যা নিয়তি দাসে কয়।